任職市場推廣的 Steph（右）和舞台劇場務的 Zita，是一對同性情侶。雖然前路並不易行，但她們有信心克服面對的困難。
壹號專題
2017的另類情人
浪漫情人，不會指定是一對港男港女。當所有情侶仍沉醉於情人節的溫馨甜蜜感覺時，其實也有一些人，他/她們未必能夠像普通男女情侶般，可以無拘無束的相親相愛，甚至不能光明正大手拖手走到街頭。戀愛自由，原來並非理所然。
社會上的確有一群非主流的同性戀情侶，即使在崇尚自由的香港，他/她們依然面對重重困難，愛得一點也不容易。在傳統道德觀念的框架下，同性戀者的愛情，或多或少受到歧視。起碼在香港這個地方，不容許他/她們結婚。女同性戀者 Steph和 Zita，兩人拍拖未夠一年，本來應該甜甜蜜蜜，但因為這段關係反傳統，擔憂的問題也特別多。男性角色的 Steph，從未向家人講出自己的性傾向，怕他們接受不來。即使能夠走下去，但始終未能夠在自己土生土長的地方，給予對方一個名分，她們覺得是一種遺憾。男同性戀者 Koch承認，香港社會仍然未接受他們這一群性小眾，尤其是對男同性戀者，態度更加抗拒。抗拒得他們不敢承認自己的性傾向、不敢在街上手拖手，甚至在情人節這些甜蜜日子，也不敢到酒店吃自助餐撐枱腳。比起女同性戀者，他們要更偷偷摸摸。同性相愛很難，異族戀也不容易。本刊訪問了兩個在香港生活的印度裔男子，他們和港女拍拖結婚，因為男女文化背景不同，當中的戀愛路程，也波折重重充滿考驗。另類的愛情故事，要細水長流走下去的話，一點也不容易。
愛情，本來就是無分種族階級和身份，但在傳統道德觀念框架下，不是所有人都接受同性愛情。同性戀者，愛情路也難行一點。
任職市場推廣的 Steph（二十九歲）和舞台劇場務的 Zita（二十七歲），是一對女同性戀者。打扮男性化的 Steph，天生便喜歡女性。外表柔弱的 Zita本來不是「孿」，曾試過跟男孩子拍拖。大半年前遇上 Steph，因為她的關心呵護，兩人變成情侶。
出櫃很難
反傳統的戀愛，總會有點閒言閒語和壓力，「壓力方面，首先要諗吓點同屋企人講，都要有勇氣同佢哋講。至於朋友，可能佢哋唔太看好，覺得你最後都會選擇男性結婚，覺得你（跟女性拍拖）都係玩玩吓，唔係認真。」 Zita慶幸家人思想開通，接受了這段關係，「都帶過佢返屋企食飯。」
這方面， Steph沒那麼幸運。雖然由細到大都是中性打扮，家人可能已猜到，但從未跟父母「 Come Out」自己的性取向，始終擔心他們接受不來，「我未試過帶女朋友返屋企，但呢步將來一定會做，不過一定要雙方關係已有一段時間，穩定一點較為適合，到時好似一般情侶咁，帶個女朋友返屋企食飯。」
這個場面，她期待已久。「朋友都唔會介意，工作方面都 OK，好彩我份工唔使著制服，要著裙就做唔到。」
外出拍拖，有時也要承受奇異目光。 Zita說：「例如我哋一齊去洗手間，可能別人都會打量一番，因為佢嘅外表好男性化，我哋拖住手入去，其他人都會望一望。」 Steph更說試過多次被人趕出女廁，「大部分都係喺外國發生，外國好少男性化外表嘅女同性戀者。入到洗手間，其他人真係由頭望到落腳，之後話：『男仔做乜入女廁，出番去。』」
她可能愛他
Steph坦言，對比男女間愛情，女同性戀者的愛情路較為難行，至少要維繫一段感情，並不容易，「我嘅角色係『 TB』（ Tom Boy），另外一半比較女性化，佢哋都會有男性追求者。
女性嘅心態，當有人對佢關心時，佢就會心動，可以鍾意番男人。」 Steph不排除有一天， Zita會再喜歡男性，她不會阻撓，確實男女的愛情路比較易行，「如果我真係愛佢，我應該為佢嘅幸福着想，應該去行一條較容易嘅路，會比較開心同幸福。」 TB的角色，往往只能被動和等待， Steph也覺得很無奈。
一段愛情，最終大家都會想結婚，組織自己的家庭。香港的同性戀者，想結婚也不易， Zita說：「因為香港同性婚姻未合法，將來我哋如果想結婚就要去外國，未必可以喺自己生長嘅地方結婚，長遠嘅生小朋友，我哋都做唔到。」
要一個身份
雖然可以去外國結婚，但 Steph始終覺得是遺憾，「伴侶嘅身份唔可以帶回港，喺香港唔能夠被認同時，社會上好多福利，例如買保險，佢唔係我乜嘢關係嘅人，就做唔到受益人。又或入醫院，佢都唔可以替我作任何決定，都係一種遺憾。」
雖然愛情路充滿荊棘和挑戰，但她們都深信，只要兩個人相處得來，彼此間有足夠的愛，其他事都不能影響她們。今年的情人節，是兩人第一個情人節，她們已計劃一起看展覽和吃飯，她們甜蜜地說：「都期待㗎，總之可以一齊過就得。」
路難行，但始終也要走下去，至少現在開心快樂便可以了。
奇異目光
「最唔開心嘅，例如情人節個個雙雙對對，總會想訂酒店自助餐，如果兩個男仔去食，會比較礙眼，會有奇異目光望你。我就唔怕，但我嘅伴侶未必接受，所以多數留喺屋企慶祝。」任職時裝設計的 Koch（四十二歲）是男同性戀者，他覺得社會仍然未接受他們這一群性小眾。
Koch自小便喜歡男性，十四歲初戀，對方是同學，自此更肯定自己是「同志」。 Koch坦言，男同性戀者比女同性戀者的情況更糟，因社會對他們更加抗拒，「老實講，兩個女孩子就算拖手，都會容易啲接受，兩個男孩子拖手，別人始終覺得難睇啲。既然知道主流社會唔太接受，就盡量唔去做。」他和伴侶出街，一定不會拖手。
就算盡量沒有身體接觸，但男同性戀者總會惹來不太友善的眼光，「會有啲好難聽嘅說話，例如『死基佬』同『屎忽鬼』等，成日都會有。」（會介意嗎？）「應該係唔能夠介意，因為我事實係一個同性戀者。」
無法結婚
愛情雖然是兩個人的事，但也須向家人交代，始終這種非主流關係，最想獲得家人認同，「用乜嘢態度去令家人接受同性戀關係，呢個難度係大嘅。」 Koch慶幸母親思想開通，主動跟他討論這問題，「家人呢條底線都跨過咗，我對外面人嘅反應完全唔會介懷。」
工作方面也會有壓力，「我做設計會好啲，可以同人講，但有啲做醫生同教師嘅，真係唔敢講自己係同性戀，否則隨時連份工都無埋。」拍拖本是開心事，總想跟人分享，奈何他們擔心暴露自己的性傾向，拍拖也只能偷偷摸摸。
Koch說自己很硬淨，不會理會別人怎看自己。他介懷的，是不能在香港結婚，「我當然想喺香港結婚，因為我都有交稅，點解我唔可以享有最基本嘅權利，呢方面係主流跟非主流情侶最大嘅分別。」
一對龍鳳鈪
他不滿政府忽略他們，「兩夫妻可以合併報稅，但兩個男士或兩個女士，點解唔可以合併報稅呢？我哋交多啲稅後，又唔能夠享用任何社會福利，例如輪候公屋，唔係每個同性戀者都係中產，唔係每個都高收入㗎。」
說到底，想結婚嗎？「想唔想結婚？當然想。但呢個只係我個人意願，最主要係社會允唔允許我結婚。」 Koch覺得這不是遺憾，而是一種歧視。形式上不能簽下婚書，惟有靠其他方面彌補，「我之前有一個同居伴侶，佢媽媽最終都接受咗我哋嘅關係，仲送咗一對龍鳳鈪俾我哋，好感動。」
這些年來， Koch不斷參與同性戀團體遊行，又參與同志話劇和網台節目，為性小眾爭取權利，「希望主流社會嘅市民，可以明白佢哋所面對嘅困難，世界應該係大同共融，每個人都有相愛嘅權利，包括同性相愛。」
可以從頭再來的話，會否選擇一條易行的愛情路？「其實唔係我揀，係父母給予我嘅，我天生就係咁，點解我仲要再揀呢？假設真係要再揀，我都會選擇做番同志。」即使愛得辛苦， Koch也無悔自己的同志身份。
印港戀不容易
即使同在香港生活，但可能因為彼此國籍不同，相愛也會波折重重。一些在香港生活的印度男子，他們戀上香港女孩，但愛得一點也不容易。
任職臨時演員、在香港土生土長嘅印度男 Bitto，四年前跟港女 Donna結婚，現時育有一對子女。 Bitto表示，未跟 Donna交往前，總會覺得香港女孩子比較粗魯和拜金主義，但認識 Donna後，她所做的一切，令他十分感動，「我媽媽當時患了癌症，行動不方便。佢不但無嫌棄，仲全心全意照顧我媽媽，佢真係犧牲咗好多，佢係一個好好嘅女仔。」說到這裡， Bitto忍不住眼泛淚光。
但這段「印港戀」，也不是無風無浪。 Bitto承認，印度人在香港，總會受到歧視，「出去拍拖時，有人會掩住嘴巴，或係坐開一啲，有一啲歧視，嗰種眼神令人好唔舒服。」
Donna起初覺得 Bitto太敏感，兩人因此經常吵架，其後 Donna嘗試站在 Bitto角度去看，去感受他的感覺，「我明白到佢係會難受，可能係從小到大都受到歧視，我咪盡量安慰佢囉。」兩個人在一起，總要互相體諒，尤其是大家文化背景不同。
習慣印度文化
結婚後，也要面對另外的問題。 Donna要習慣印度文化，要學印度話跟 Bitto的親友溝通，「在溝通方面會比較困難，因為奶奶主要講印度話。有時佢哋坐埋一齊傾偈，有人突然會講印度話，我會諗係咪講我壞話呢？」為了維繫這個家， Donna也盡力克服文化上的差異。兩個不同國籍的人，譜出一段令人羨慕的愛情。
而做文職工作、同是在香港長大的印度男阿龍（四十三歲），曾經回印度結婚，育有三名子女，「係盲婚啞嫁，夫妻間無感情，所以最後選擇離婚。」離婚後，他曾交過香港女朋友，他承認印度男子和香港女性，大家在性格和思想上，也有很大的差別。
其中一名本地女朋友，便覺得跟着阿龍將來不會有好的生活，最終分手，「可能佢人望高處，女人都係貪新忘舊，見到新事物就走去嗰邊。我都知道，不管花多少心思，都做得唔夠，所以我唔想再浪費時間，選擇分手。」這十多年來，阿龍也沒再戀愛，但仍希望跟香港女孩子拍拖，「暫時我都覺得，香港女生比較好，大家溝通會比較好，始終香港女仔思想會開通啲。」
雖然一個人，但他也不會覺得寂寞，「單身都可以快樂浪漫，我自己騎電單車喺馬路上睇吓街景，我就覺得好浪漫啦。」
麻甩佬自己的浪漫
在土瓜灣開傢具維修公司的盧泉（六十歲），雖然單身過情人節，卻能找到單身的浪漫，他自製「 K房」成立歌舞團，跟一班大媽唱歌跳舞，娛人娛己。
他曾結婚，育有三名子女，但因為堅持歌舞團要做下去，她的前妻和子女也離開他，「我前妻話我有婚外情，疑心太重，因為我搞咗一個歌舞團，佢就成日滋擾我、跟蹤我、搗亂我嘅歌舞團，造成婚姻破裂。」
離婚後子女背棄他，惟有寄情唱歌，認識更多朋友，他也不打算再談戀愛，「唔諗啦，我又無錢，自己會難過，點諗啊？（情人節如何過？）搵朋友傾偈，唱 K囉，哈哈。」
在 DJ界享負盛名的 Ryan Li（李冬麟），並不如外界想像，有很多女朋友、不缺桃花，他選擇單身度過情人節，因為對他來說，單身的時間可以做自己最浪漫的事，「喺夜場（工作）成日都咁嘈，返到屋企就會想靜吓，所以我多數會聽歌、睇戲，或者約同行朋友出嚟飲嘢、燒嘢食。唔怕拖嘅話，私人空間係會多好多。」
Ryan不怕找不到伴侶，因為他認為男人不一定要談戀愛，才能活得精彩，最重要是活得開心。
浪漫，其實是一種心態，並不受性別和種族限制，就算自己一個也可以。
撰文：程志康＆嘿文
攝影：王晴＆海江田
news@nextdigital.com.hk
|
鍾意就快D Share啦！
|
|
|
