熱爆娛樂: 大劉千五萬包大國手 [壹週刊 - 1406

2017年2月16日星期四

大劉千五萬包大國手 [壹週刊 - 1406 - 財經] __,大劉,劉鑾雄,M1,

換腎後的劉鑾雄不時返回養和覆診，院方有兩名腎科及泌尿科大國手侍候。

中環人語

大劉千五萬包大國手

包一位名醫到底要花多少錢？中環醫生界傳聞頂級富豪有次心臟有事，幸得富豪御醫廿四小時 standby，名醫獲呢位富豪送上一張 blank cheque，銀碼幾多任寫，其富貴友人問：「醫生貴還是明星貴呢？」御醫話：「係咁意，一刀斬落去真係想退休咩？」聽後搞到班有錢佬都好迷惘，冇個 bench mark，日後搵名醫救命點計數呢？

養和醫院不愧為名人醫院，跌傷影星劉德華及中風鄭家純在養病，富豪何鴻燊、劉鑾雄不時覆診，認真星光熠熠。

不過大劉為名醫 mark咗第一口價！換腎後的大劉不時要往養和覆診，大劉繼老來包廚（從福臨門包起廚師作家廚）後，連醫生都要包，聽聞大劉以每位千五萬一年，包起兩位駐院醫生，隨時 on call候命招呼佢。醫生界估計大劉應該聘請了泌尿科或腎科醫生，養和主理呢兩科的大國手呼之欲出，不外乎教授級的 Dr. Wong及換腎專家 Dr. Lai，千五萬包一年，班上咗年紀有錢佬非常關心，起碼心中有數。

情人節「大酒店」歎燭光晚餐

昔日陸羽茶室三樓，有十二壯士經常在此打躉，但此情將不復見，因為連最後一名壯士 M.B. Lee李文彬會計師也在年三十晚，以高齡八十八歲仙遊，呢位老牌會計師是諾貝爾物理學獎得主高錕，在聖約瑟書院孖住櫈仔坐的同窗，亦係全港第十二位註冊會計師，冧把為 F012；六、七十年代接香港唔少地產佬生意做核數，幾十年以來一早在陸羽飲早茶，交流市場訊息以及八卦富豪之間秘聞，呢位精靈會計師亦有兩位太太，和平共處相安無事， M.B. Lee喪禮選正情人節在「香港大酒店」守夜，咁都係點蠟燭嘅燭光晚餐啫！在此祝 M.B. Lee在天之靈也感受到情人節 sweet！ M.B. Lee生前好肯提攜後輩，現財爺陳茂波當年剛上任香港會計師公會主席時未有「朵」， M.B. Lee遂叫記者多多訪問陳茂波，未知呢位世姪情人節晚上會否向前輩送上最後一程？

陸羽茶室的三樓，是昔日「十二壯士」聚腳地，隨着最後一位壯士上天堂，一切已成追憶。

收藏古董老爺車是李文彬一大嗜好。

李文彬（右）早年與同窗高錕（左）返回母校聖約瑟書院聚會。

中環寸嘴：一落機就同 sales開年

我唔係淨係識食嘅，去到邊𥄫到邊。拉斯維加斯賭場酒店，連張紙巾都有心思；整啲懷舊 feel，吸引「食息行 Mall」嘅退休老人家去㩒角子老虎機，好似時光倒流五十年咁。

喺溫哥華過完年返到香港，有啲 jet-lag，個人呆呆哋，諗住去美容院做個 facial輕鬆吓，哈，點知要我同個 sales「開年」，我仲有大把 program都未用完，就喺度 sell我再買，我即刻「×」佢，呢啲 sales係侮辱個客智慧，嚟一次 facial就簽一個 program？咁咪有排都用唔完？個客嚟到係想輕鬆吓，唔係嚟受壓俾你做壓力測試㗎？阿叔我大學畢業都係做行街 sales，幾十年來都同唔少做大 deal地產 sales周旋，你估我唔知 sales啲衰格嘢，呢個 sales唔用腦，只係識用女賓角度出發，以為好似啲「阿太」隔日嚟，密密做 facial，我日理萬機，最多咪一個月嚟一次清吓黑頭，你 sell我貴一貴一次 facial可以 last for好耐，我仲慳番啲時間，呢個 sales完全都唔係 sell開男賓嘅底，仲搏個客唔敢鬧佢！

唉，我見得 sales多，來來去去都係嗰幾道板斧，一係搏同情，又唔知呢個世界長貧難顧，有個老友仲話我：「啲 sales諗住你大把錢唔志在，漏啲出嚟俾佢嘛！」唓，我有錢捐咗佢唔好，都叫做積吓陰德！不過咁，我 XYZ完個 sales，佢都可以同上面老細講交咗功課，「嗱，我已搏到盡捽個客。」

今年返溫哥華落咗幾場雪，搞到街道大塞車，惟有踎喺間屋，望吓海景，大地在我腳下咁啦。

楊國佳

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

鋤 D會群龍無首

新世界主席鄭家純（純官）從彤叔手上接棒，任鋤 D會第二代吹雞人，賭術精湛的純官贏過唔少內房股老細錢，自年三十晚中風後，年初四生日的純官都要在養和度過七十一歲生辰，而鋤 D會「台柱」大劉亦要出入養和，活躍成員恒大主席許家印近日更被「明鏡新聞」指繼肖建華後被內地調查，一時之間鋤 D會群龍無首；其實何不諗諗在養和包房開局，鋤 D贏輸有時都會興奮過度，起碼有醫生護士廿四小時 standby，不過鋤 D會成員可能要問過正印鄭太葉美卿先，因為自純官中風後，現時任何人接觸純官都先要經過鄭太。