大台下星期有個新實況節目《有樓萬事足》，節目仲未播出就惹嚟疑似造假之嫌。其中一個「素人」Seasun爆出金句「有樓有高潮」、「冇樓唔好白撞」，即刻掀起全城圍插佢係「拜金港女」；不過，有網民質疑呢個Seasun係「媒」，因為節目編導岑應多次被踢爆喺實況節目中造假。Seasun真係語不驚人誓不休，噚晚出席活動宣傳時，喺台上自我介紹話自己返過教會，對於男人要有2000呎屋先係基本，佢解釋﹕「問我理想家居，咁梗係有咁高講咁高啦，人望高處嘛。唔知大家把尺放喺邊，我咁講就可以有條尺拼一拼，咁件事容易啲去處理好多，清晰啲。」佢講明如果有人送樓追佢，佢會毫不猶豫收下，不過依家就暫時冇男友，亦都冇人追。唔少網民已經將Seasun人肉起底，現年22歲嘅Seasun現職珠寶公司公關，已經有5年嘅相關經驗，又曾經幫過出名紅顏知己多嘅趙世曾打工，工作範圍包括出席活動，亦會陪來自北京嘅客人，仲有參加過趙世曾舉辦嘅《國際旅遊小姐》競選。早前佢接受周刊訪問時話因為岑應靚女，似林志玲，同埋自己鍾意拍片，想留低一啲回憶，所以就答應做節目。對於網上一面倒嘅負評，Seasun話完全唔介意，因為佢「好proud of做港女」，而且對批評佢嘅人互不相識，讀書時已經被人排斥，但當時已經「好識諗」同自己講「將來要叻過佢哋」。有人質疑，Seasun喺再之前嘅訪問中話揀男人講seven sense(第七感)，咁同今次節目講嘅似乎有啲前言不對後語，Seasun話撇除買樓嘅擇偶條件，都會睇feel，喺feel同買樓之間都會傾向feel多啲。
|
鍾意就快D Share啦！
|
|
|
