難得老公唔使返大陸開工，一家三口出動，幸福滿瀉！
娛樂偵訊
老公湊仔陪買 黃伊汶幸福爆
黃伊汶 14年與小龍（陳國坤）結婚後，去年誕下兒子陳真並極速收身，近日夫唱婦隨，復出拍老公做監製的網劇《反黑》。日前一家三口出動 shopping，只見陳國坤左手抱住陳真，右手拖實老婆，幸福 man爆！
俾面老公
陳國坤同黃伊汶拍拖五年修成正果，去年誕下勁得意的 B仔陳真，火速成為星二代明星仔，拍住可愛到出晒名的梁浸浸，成為傳媒版位風頭躉。
得天獨厚，黃伊汶產後唔夠一個月，已火速修身變索媽。
「陳真好少扭計，又遺傳咗媽咪對大眼睛，勁 cute！大家成日借啲意約佢哋兩公婆，都係想見吓個得意仔！小龍開工成日唔喺香港，惟有揸住部手機睇相睇片， Emme（黃伊汶）知老公恨見個 B，所以經常帶埋囝囝去探班！」黃伊汶身邊人說。
早已成為全職生意人的黃伊汶，近日忽然復出拍網劇，再嘗捱更抵夜滋味，全因身為監製的老公開到口。
「 Emme只係客串幾場戲，小龍安排佢戲中做番自己老婆，大家都笑佢冇益人！兩公婆帶埋陳真去開工，乘機家庭樂！」
自得其樂
唔使開工，兩公婆抱埋寶貝仔家庭樂。下午六點幾，在時代廣場連卡佛，黃伊汶睇鞋，陳國坤就抱住囝囝行來行去陪買。大眼陳真下個月才滿一歲，眼仔碌碌不時將手指放入口，雖然陳國坤每見囝囝啜手指，便會用手撥開阻止，但陳真迅即又將手指仔放入口，兩父子你來我往，十分搞笑！其間陳國坤攞住副圓形太陽鏡拼落囝囝面上，自得其樂。
至於 fit過佗 B前的黃伊汶，試完一輪鞋便自動歸隊，更第一時間抱住陳真，有子萬事足！
轉型從商
10年，黃伊汶棄歌從商，引入法國水晶腕錶品牌 Galtiscopio（迦堤），初時只於 I.T、 Sogo等設專櫃擺賣，其後拓展亞洲市場，於香港、內地、新加坡及日本等地設逾四十個銷售點。 15年，更在深圳開設二千呎旗艦店，除了手錶，還引進時裝及手袋，將業務多元化，成績理想。
撰文、攝影、攝錄：娛樂組
|
鍾意就快D Share啦！
|
|
|
