有危就有機，此話不假。大劉說：「哈！有時一個人食幾多著幾多，真係整定。嗰時有個猶太佬，我又比較aggressive（進取）啲，嗰時卸啲貨畀佢，去到美國先畀錢，等佢周轉期唔使咁長，點知貨到，佢露出猙獰面目，佢話5折就找數，嗰時我都係賺15%，咁點呢！」「我即刻自動獻身話7折，蝕30%，100蚊攞番85蚊返嚟就算喇！因為要用佢個牌子，唔可以將啲貨賣畀第二個，點知佢話5折。我租個3,000呎倉，將啲貨入倉，賣畀佢5折，咁咪輸得好甘？我寧願將啲貨入咗倉，逐盒逐盒自己拆，換咗自己個牌子先賣到畀人。」走投無路時，這個猶太買家又「老點」了大劉去芝加哥，沒想到竟會給他翻身機會：「佢有個展覽喺芝加哥，book咗酒店，唔去都要畀錢，佢唔捨得損失，諗住叫我去消咗啲房嘅成本。我去到，坐咗兩三日，突然坐坐下猶太佬趕我走，我好醒目，扮走，再喺二、三百米外睇下乜事，見到有個擔住支煙嘅美國人行埋去，猶太佬好熱誠招呼佢，指手劃腳指住風扇傾咗大約廿分鐘。美國人走咗之後，我遠遠跟咗佢成千五呎先敢蒲頭，同佢講我係廠家，條友仔話呢幾日唔得閒，就俾咗張卡片我。」【遇好心工程師打救】
「幾日後我去搵佢，先發現自己係廢柴中嘅廢柴，懵炳中嘅懵炳！原來我哋賣風扇俾猶太佬，個猶太佬好叻好蠱惑，我哋嘅風扇唔符合美國安全規格，猶太佬將風扇加工變為合規格，我哋唔知嘛！結果我喺芝加哥踎咗三個月，先至發現自己係廢柴中嘅廢廢柴！乜都唔識！「好彩人緣好，同埋出門遇貴人，遇到個好嘅工程師教我，前後用咗三個月，將唔合格風扇變合格。我再去見美國人，佢話第一次買呢個產品，估計一年同我買24,000把風扇，點知最後買咗24萬把風扇，多十倍！所以一個人嘅轉捩點，人算不如天算，我都冇諗到突然可以窮人大翻身。（如果唔係跳樓？）乜跳樓呀，一定執笠，都唔敢返嚟，無面見江東父老。」
統籌、採訪：陳月媚
攝影：陳俊強
攝錄：NEO、馮嘉銘、吉吉相關文章：
【劉鑾雄講大劉（1）】
獨家 千億富豪劉鑾雄 24歲問家傭借錢入院割膽
http://bit.ly/2ngVqNq【劉鑾雄講大劉（2）】
走過三輪水貨 「風扇劉」血淚史：唔夠半年已經冇錢出糧
http://bit.ly/2obalOj【話你知】同大劉有關係嘅名人、美女有幾多? 即睇「大劉人物關係圖」: http://bit.ly/JosephLau
|
鍾意就快D Share啦！
|
|
|