譚詠麟(阿倫)、區瑞強、肥媽Maria Cordero、森美，噚晚喺尖沙嘴出席謝瑞麟80壽辰晚宴，阿倫講到關淑怡涉嫌刑事恐嚇同普通襲擊被捕，佢話好耐冇同對方聯絡：「我有睇報道，畀啲時間佢諗清楚點做啦!」傳聞話關淑怡有財政困難?阿倫即刻話：「成個珠江三角洲嘅人對佢嘅歌都好熟悉，佢嘅歌亦好有實力，咁多歌迷，佢咁多金曲，珠三角有過億人口，好多人都聽廣東歌，佢要的起心肝。」問阿倫知唔知關淑怡係咪好多心結?佢話：「我唔知佢有乜嘢心結，有咩諗唔開？其他人幫唔到佢，佢要靠自己。」有報道話志偉幫佢解決財政問題?阿倫即衝口而出：「梗係，志偉係佢老竇喎。」傳話關淑怡連志偉電話都唔聽喎?阿倫笑話：「吓，係咪佢掛住打邊爐?」阿倫話以前曾經勸過關淑怡：「勸都唔係今時今日嘅事，以前出嚟已經叫過好多次個人放鬆啲，咁長日子要佢自己照顧自己，其他人唔能夠提點太多，要佢自己面對。」阿倫仲爆料話以前好關心關淑怡，仲同佢講過唔好成日都咁騰雞，唔係個個都對佢唔好，佢自己睇嘢嘅角度要扭正啲。」講到有傳酒店對佢cut水cut電，阿倫有啲愕然話：「點可能咁?如果真係唔租可以叫佢走，唔使cut水電，使唔使門口放煙攻佢呀?」阿倫仲話以前寶麗金歌手同工作人員常有聚會，大家都有關心過關淑怡。另外，同場嘅區瑞強就話籌備緊開音樂會，回顧40年唱歌生涯，想請志偉同阿倫做嘉賓。
| 攝影：王連連 | | |
| | | |
|
鍾意就快D Share啦！
|
|
|
