天后容祖兒在演藝舉行side track演唱會，她唱完《去火星戀愛》後大談擇偶條件的少女心事：「你哋笑咩啫？你哋覺得自己有機會咩？真係有嘅，世人冇法明白我嘅擇偶條件，我都覺得自己好特別，我完全唔睇外表，我唔鍾意靚仔，唔好笑，唔鍾意靚仔，但唔係鍾意醜樣，above average is ok，我鍾意有肉地、肉騰騰、滑嘟嘟。」有歌迷大叫陳奕迅，她即笑言：「佢係below average，哈哈，I'm sorry，太直。我鍾意好攬，因為有安全感，好似阿Y（黃偉文），如果佢ok我ok，但當然佢唔ok我。」全場大笑，之後唱出《遲鈍》。唱完她繼續講擇偶條件：「我鍾意嘅類型好多種，其中一種係冠軍，鍾意音樂才子，有啲人一攞起樂器魅力就咇晒出嚟，例如何炳。」
唔敢講「愛」
唱完《我的麻煩男友》後，祖兒繼續分享心事：「分享一啲心底裏嘅回憶，每人都有初戀，我鍾意書信來往，依家就絕密公開我13歲初戀寫嘅情信。」她謂用的是AP Duck信紙，大家即大笑，因為她一直都以為此是PC Duck，之後她讀出：「93年3月16日，Dearest 嘟嘟嘟，你好嗎？我啲字靚唔靚，值幾多分，呢張PC Duck信紙係特登買嚟送畀你，哈哈，點解我會x你，因為你可愛、得意，不如你都寫信畀我知點解會x我嘅，仲有3個月我就生日，可唔可以同我講生日快樂。」又問大家知唔知點解呢封信會去番佢手上：「因為分手之後佢畀番我，放番我嘅信箱，同我一刀兩斷，每人都有一段慘不忍睹嘅過去。」她問大家知唔知x代表咩，歌迷大叫愛，她謂：「咁大膽，13歲嘅我好細膽、含蓄，連鍾意你都唔敢講，直到依家33歲，哈哈係講細咗，都係含蓄，但我有好多情歌可以代表我嘅心意同我愛嘅人同大家分享。」之後唱出《身驕肉貴》。
嘆人生無常
唱完《新貴》後，祖兒表示此曲的MV很難忘，藉此悼念去年離世的化妝師Arris：「呢個係佢最後一個幫我化妝嘅MV，2016年我經歷咗心情失落嘅時段，最親密嘅戰友佢離開咗我，我知我好幸福，好多小天使幫過我，我有個怪脾性，我好怕生寶，所以我身邊同我做嘢嘅人都識咗十幾年，所有幫過我嘅人唔只工作，一齊分享高低起跌，佢離開我用咗好一段時間接受，唔明生命點解咁化學同無常，前幾個月佢仲幫我真人騷化妝，但後幾個就瞓喺醫院到，佢離開好可惜，今次係佢唯一一次冇參與我最開心嘅節目，但我知道佢一定會戥我開心，佢永遠都係沉默寡言但成日笑嘅女仔，希望大家珍惜身邊人，人生就好似列車咁有出有入，永遠捉唔住要走嘅人。」之後她唱出《舊日回憶的山丘》及《一直看見天使》，台上播出她們的合照。
|
鍾意就快D Share啦！
|
|
|