吳綺莉疑閉門失竊 卓林認攞走結他：點知佢會報警！
藝人吳綺莉前晚報警，聲稱跑馬地寓所有一批合共約值17萬元的財物不翼而飛，包括2隻戒指及2支結他，警方暫列作盜竊案，但不排除閉門失竊。早前已搬往北角與女友同居的卓林昨午現身，提到阿媽報案時說：「我有攞結他，點知佢會去報警！」
單親媽媽吳綺莉（Elaine）與女兒卓林今年初因交友問題發生爭執，其後卓林入院留醫兩個多月，期間Elaine在記者會聲淚俱下求女兒回家，最後她守得雲開，卓林重投母親懷抱。不過，卓林月前離家與外籍同性密友Andi展開同居生活，還大方出櫃：「I'm gay！」令母女之間再起變化，直至前晚Elaine疑閉門失竊，兩母女關係又緊張起來。
警方發言人表示，前晚（29日）10時許，一名45歲姓吳女住戶於跑馬地大坑道宏豐臺寓所報案，指單位內一批財物不翼而飛，包括衣物、兩隻價值約7萬元的戒指以及兩支約值10萬元的結他，懷疑有人入屋爆竊。警員調查後發現單位沒有被撬過的痕迹，遂將案件暫列盜竊，交由灣仔警區刑事調查隊跟進，暫未有人被捕。
「我有佢畀嘅鎖匙」
曾與媽咪居於上址的卓林，昨午2時許與女友Andi離開北角愛巢，到港鐵站附近逗留陪女友煲煙，之後結伴到站內櫃員機提款，再乘港鐵到灣仔一間找換店。記者上前追問母親報案一事，卓林起初不願多作回應，但與女友討論後突然主動回應記者：「你哋想知乜事？OK，我同我媽講好，要嚟拎番啲衫同嘢，但我去到佢又唔喺度，嚟緊我要出Trip，所以要拎番幾件衫，咁我就入咗屋。我有佢畀嘅鎖匙，門鎖亦都冇換，咁我除咗拎衫之外仲拎咗結他，因為我冇結他，有嘢我係拎咗。我有同佢講番係冇問題，點知佢會去報警！我都有問佢幾時返（屋企），因為有事同佢傾，點知我突然收到電話話報咗警，心諗報乜警？（媽咪搵你？）係警察打嚟！佢冇搵我。」問到有否攞過手錶（報稱應是戒指）？卓林回答：「我冇攞過任何嘢！」傾談後，卓林與女友進入一間餐廳，隨後失去蹤影。
一臉憔悴：交畀社工
至於Elaine受訪時指家中設有閉路電視：「不過我唔識睇，陣間等警察嚟睇，睇吓有咩人出入過。（知道卓林下落？）我搵唔到佢。」昨午約2時50分，戴口罩、穿拖鞋的她離開寓所往取車，期間一直講電話，一臉憔悴。10分鐘後見她折返，並拿着一袋外賣。面對記者追訪，她只說：「唔好意思！（女兒係咪話你知攞走咗啲嘢？）真係冇嘢講，交畀社工（銷案？）真係唔知，唔好意思！（再聯絡女兒？）唔好意思，搞到大家！」其後，數名便衣探員離開大廈，記者追問是否調查Elaine的案件？他們說：「係嚟處理一宗失竊案，詳情要調查先知。（係咪睇咗閉路電視？）要調查先知！」
警員離開後，Elaine於傍晚近6時再獨自開車外出，先後駛至灣仔、銅鑼灣，最後到跑馬地的便利店停車，擾攘近一小時原來只為買雪條。返家前，她被追問知否卓林現身？她只搖頭聳肩示意不知道。提到卓林指不明白她為何報警及稱隨時可找她取回物品等問題，Elaine一概只答：「唔好意思！」至於卓林昨晚與女友再度離開寓所，原本行正門的兩人一見記者即折返及走後門，但再次遇見記者，旋即於第三個門口出去。兩人到超巿買甜筒，可謂與母親心有靈犀，但未有回答是否攞走母親的戒指。
文：影視組
|
鍾意就快D Share啦！
|
|
|