李佳芯(Ali)早排喺新加坡《星和無綫電視大獎》爆冷封后，有指今次佢撼贏胡定欣同宣萱，連佢自己都覺得意外。話晒《星和》係台慶頒獎禮嘅得獎指標，好似舊年陳展鵬同胡定欣，喺新加坡擸完視帝視后獎，緊接喺台慶再下一城，定欣冧莊攞視后，陳展鵬亦毫無懸念封帝。
不過今日有報道指李佳芯爆冷封后，原本有望冧莊嘅胡定欣，就覺得對方未夠班攞獎，事關好姊妹黃智雯同姚子羚資歷深過佢，都未曾攞獎，而定欣本身亦睇好回巢拍劇嘅宣萱，點知最終雙雙敗喺Ali手上，定欣自然唔服氣。報道指定欣已號召一班「胡說八道」好姊妹同「Cracyrunner」一班老死，喺嚟緊台慶當晚，一致投宣萱做視后，就算自己冇機會再冧莊，都唔想益「外人」咁話。
至於冇得埋堆嘅Ali，噚晚現身馬場，為浪琴表錦標賽擔任嘉賓，人逢喜事嘅佢，以一身白色大露背晚裝現身，齋睇背脊已經加晒分，成為馬場另一亮點。
來源 source: http://hk.apple.nextmedia.com
|
鍾意就快D Share啦！
|
|
|