習近平打貪五年，查處超過二百多萬黨員，唔少富商都驚牽涉其中。
中環人語
十九大期間 強國富商大舉南下
上星期中共十九大開鑼，雖然地點喺北京展開，但唔少內地政商界人士反而大舉來咗香港，何解?
咪就係正正係要避開十九大囉；對上一次十八大，好多高官之後都俾人捉咗去問話或者紛紛落馬，而每個高官後面，都係一個千絲萬縷的利益集團，藤褦瓜瓜褦藤，牽連真係「誅九族」嘅級數。到今次十九大，唔少商人驚會受到牽連，都話要南下香港避難。唔少喺香港設分公司嘅中資，都收到上頭嘅「柯打」，話大老細呢排會嚟香港，要醒醒定定招呼咁話。
而前幾日小宗就喺中環中心對出，見到久未露面、「卓京系」嘅掌門人覃輝。覃輝做生意不嬲多瓣數，除咗係星美國際（ 198）大股東之外、又係「天上人間」夜總會老闆，喺上海同北京持有多間傳媒，更加同李嘉欣傳過緋聞。○五年佢因為涉及原建行行長張恩照案，被有關部門帶走協助調查，逐漸淡出。○九年仲被指係另一行賄案嘅最大行賄者，但出奇無被檢控。今次「再現」香江，唔通江湖有事？
誠哥的放工時間
上星期，外賣公司 UberEATS公布全港最多人叫外賣嘅大廈，負責人話，數據顯示，夜晚八點至十點呢個 OT時段，長江集團中心係全港最多人叫外賣嘅地方，其次就係港島東中心同環球貿易廣場（ ICC）。
此三個地方，是 banker和海歸的集中地，印證金融錢唔易搵也。不過小宗記得誠哥講過，自己非常健康，每朝五點九就起身，打一個半小時高爾夫球同游水，之後返工，更加有報導指他六點就準時收工，絕對唔會俾自己過勞。
同一時間，小宗又聽過啲後輩講，喺長江集團中心打超人工，係中環出晒名辛苦。網上討論區，不時都有人講長江一號「有超時，無準時」、「 OT O到 12點」。有部分公關妹妹，日日起碼做到九點十點，有次做晒嘢執包袱準時走人，竟然引來同事驚愕眼光：「做乜你咁早走嘅？」更斷定她不想升職。原來同事們都識「攤長」啲嘢嚟做，事關準時放工承受極大壓力。做老闆同打工仔，總係有差別，想喺大機構突圍而出？捱住外賣飯盒先
「掌心雷」搞掂陸羽茶室
陸羽茶室喺中環都有成八十年歷史，每一層樓，都有佢嘅「勢力分布」，例如地下嗰層一定係老闆級，以前一定有班通天經紀開定位等老闆來收風，上一層就多包租公，因為佢哋得閒，慢慢歎。唔少政商名人熟客一早已經 mark晒位。稍為生面口嘅，就算訂位都未必有位俾你坐。但近排小宗就聽到，有個無乜名氣嘅商人，竟然都可以爭到櫈仔，大家都好出奇，究竟用咩方法？
原來，係商人個仔識得發功。話說第一次來陸羽，兩父子吃了閉門羮甚為無癮。個仔為咗氹番老豆開心，第二日就搵熟人訂位，一去到，再使出「掌心雷」功勢，即係將一百、二百，係咁「塞」入員工手中。一個月後，成間茶室都識得呢位老細，自然唔使訂位，一行入陸羽就有位坐！
|
鍾意就快D Share啦！
|
|
|