睇落俾簡淑兒鎮定的郭奕芯，話俾對方頻頻大嗌嚇親。
探熱針
鬼屋探險 郭奕芯嚇到爆粗 簡淑兒：「 feel到心臟停咗」
個個都拍鬼片，唔通個個想拍鬼片咩？
宅男女神「少女標本」的簡淑兒同埋曾經全裸演出的郭奕芯正正是人辦，兩個膽子只有五毫子般大，偏偏遇上鬼片《鬼網》招手，唔想錯失機會，開工 keep住心慌慌。呢日搵佢兩個試玩逃出密室測試膽量，兩個齋見間房有假人公仔，已經嗌到拆天， Ashina（郭之洋名）更嚇到失控爆粗，至於 Jessica事後就話：「 Feel到心臟停咗！」有冇咁誇張呀？
中招
被網友叫做「仙氣女神」的簡淑兒，坦言自細已好細膽，一個鬼古已經可以令她失眠，所以恐怖片《鬼網》搵她埋位，仲講到明要出埠去出名多鬼怪傳聞的馬來西亞取景， Jessica話掙扎咗好耐先肯接拍。
「無諗過自己第一套電影會係鬼片，拍嘅時候劇組仲要搵咗間荒廢咗好耐嘅屋，好彩有家樂（陳家樂），因為佢喺入面做我阿哥，我成日拉住佢，搵佢傍實。」簡淑兒說。
至於另一主角郭奕芯（ Ashina）所拍攝的單元同樣在馬來西亞取景，雖然不是密室取景，但拍攝其中一個場口仍然有怪事發生。
「都唔知算唔算，講講吓對白唔係沙聲，唔係有痰，突然出唔到聲，拍完之後，經理人話我知頭先個畫面黑咗，乜都睇唔到！呢件事對我嚟講好奇怪，我未試過！」郭奕芯說。
喪叫
拍戲的時候已經嚇到個心離一離，《壹》仔就搵她們去鬼屋探險，挑戰吓她們的膽量，去到密室現場發現入面是靈堂的布置，加上燈光陰暗， Jessica即時面色一沉話：「如果驚得滯可唔可以俾我離開抖抖？」最終順利完成靈堂前的各種任務， Jessica孖住 Ashina進行 round 2的任務，門口一開，旁邊站着個婚紗打扮的假人， Jessica驚叫彈開，旁邊的 Ashina也連退幾步嚇到爆粗，「佢識郁呀！×！好似望住我！」回過神來， Jessica再望多兩眼，口窒窒說：「假嘅……假嘅！」話口未完，另一個躺着的假人公仔，慢慢坐起身，兩個拖住手驚叫走開。
Jessica驚到投降說無法再玩下去，最終虛擬任務要靠郭奕芯先順利完成。 Jessica事後口震震話：「我嗰種驚唔係一般嘅驚，我係 feel到心臟停頓嗰種驚！」
相比之下，郭奕芯看似較鎮定，但當事人就話係扮出來的，「佢（ Jessica）咁驚，我就唔可以再驚啲，如果唔係唔使玩！」
撰文：娛樂組
攝影：李溢敏、吳斯金
髮型：郭奕芯： Iman Tang@hair corner cwb、簡淑兒： Daniel Chang@Salonamarone
化妝： Winnie Law@be.june wedding
服裝：簡淑兒： Toutacoup@it
場地提供：逃出香港＠旺角
|
鍾意就快D Share啦！
|
|
|