坦白講
歡迎飛往加德滿都
「一擰轉頭，幢兩層高嘅樓就冧咗落架的士度。嗰陣我都未識得驚，直到上咗公司派嚟架飛機，坐低……」空姐 Alice不時申請調飛香港至加德滿都的航線，喜歡當地人的純樸，更因她是當地一個拯救被人口販賣兒童的機構成員。
兩年前，尼泊爾發生七點八級大地震當日，她和朋友準備將在香港收集到的衣服，拿到當地跳蚤市場出售，為組織籌集經費。如果遲十秒落的士，她可能已被壓在兩層樓的石屎下，再也見不到當地稱她為「 sister」的孩子追着她跑……
我大學主修小學教育，實習後發現自己唔係好適合，打算搵其他工。有朋友提議一齊去考空姐，我覺得幾好呀，可以周圍飛，當去旅行。點知最後我考到，佢考唔到，就係咁，我做咗十年空姐
機艙事務長
不過近年我已經唔會日日飛，每個月有一半時間留喺香港做 training，訓練新人。好似頭等艙咁，客人嘅餐點會好似 fine dining一道一道菜上，當然你要稱呼對方陳小姐、黃先生，唔係「普通」嘅先生小姐，所有服務都會尊貴啲，呢啲都需要經過訓練。
我好耐之前已經申請調飛尼泊爾航線，因為鍾意當地人嘅純樸，而且有一整日嘅 layover，比較輕鬆，我仲可以去附近嘅寺廟行吓，去市集食吓嘢。
幾年前我喺飛去加德滿都嘅機上，認識到一個救援組織成員，跟咗佢去參觀兒童之家。十幾二十年前尼泊爾發生內戰，當地村落好多父母覺得送仔女去首都加德滿都會安全啲，可以接受更好嘅教育，佢哋俾錢中介送仔女過去。點知啲中介其實係人口販子，被帶走嘅小朋友最後住喺環境惡劣嘅孤兒院，唔單只冇書讀，有啲仲被迫去做嘢，甚至乞錢。
機構拯救返嚟嘅小朋友會住喺兒童之家，近年少咗人口販賣個案，機構開始做青少年服務。我幾年前就幫手喺香港成立分支，主要做宣傳同籌款。上年十一月，我同機構成員登上尼泊爾珠峰基地營，來回總共行咗十二日，都籌到一筆錢俾兒童之家。
Sister
依家我大概每兩個月就有機會調飛加德滿都，一落機已經係深夜，第二朝一早去兒童之家同小朋友食早餐，然後同佢哋行大約半個鐘，送佢哋返學。班小朋友都叫我「 sister」，如果好彩飛到週末航線，我就可以同佢哋玩足全日。
每次飛尼泊爾，我都會帶物資過去，電腦、書、衫褲鞋都有。我班同事都好熱心，好多時佢哋捐出嚟嘅衫都好新淨，有啲新到仲掛住價錢牌。如果太大件唔啱小朋友着，我有時會攞去當地跳蚤市場賣，幫機構籌集經費。
一五年四月我飛去尼泊爾，落機後第二日，同機構負責人 Kyle打算攞啲物資去跳蚤市場賣。我哋上咗的士冇耐，架車搖吓搖吓，以為爆胎，我哋就同司機落車睇吓發生咩事。點知一落車成個人都企唔穩， Kyle幾秒後反應過嚟，同我講：「 Alice, something's wrong. We have to go!」
地震受害者
當時震到好似拍電影咁，周圍好大聲，塊地上下咁搖，到我反應過嚟，擰轉頭一睇，一幢兩層高嘅樓就冧咗落架的士度。原來，我遇上尼泊爾幾十年嚟最強烈嘅地震。
好好彩，我哋三個都冇事，去咗附近一塊空地度等。當時我未食早餐，又餓又冇水飲，附近居民好好，俾咗啲餅同水我，佢哋唔會計較，嗰刻你睇到佢哋嘅善心。等到四點幾，我哋知道再唔走就要留喺度過夜，我決定一個人行返去酒店。一路行一路問人，個個見到我都叫我搭車，因為要行兩三個鐘先到，但當時啲路爛晒，根本冇車可以行，最後我趕喺天黑前返到酒店。
我哋嗰晚瞓喺酒店外停車場，公司第二日派專機接我哋同滯留嘅港人。我哋返入大堂攞行李，我仲坐低諗住化個妝，點知已經有職員吹口哨，大叫：「 Evacuate！」（發生餘震）我嗰陣咩都諗唔到，一手攞起附近唔知邊個嘅手袋，就衝出去，嗰次應該係我人生中跑得最快嘅一次。
我起初都唔知道我原來咁驚，到我上咗飛機，一起飛，我先發覺原來我經歷咗咁多嘢。返到香港我有一個月返唔到工，請咗病假，電話震我會好緊張，搭扶手電梯有少少震我都會驚，醫生話我有輕微創傷後遺症。病假呢一個月，我除咗休息，亦都為受地震影響嘅尼泊爾人籌款。
雖然經歷地震，但我飛一程機就返到安全嘅香港，當地人就要承受天災帶嚟嘅各種影響。好番之後我仍然繼續飛加德滿都航線，當地人會因為我同佢哋有共同經歷，更願意同我分享。
撰文:劉卓瑩
攝影:林金展
|
鍾意就快D Share啦！
|
|
|
