菊梓喬同張景淳等所有觀眾離開，才捨得行出戲院。
探熱針
《勁歌》頒獎禮取代吳若希，菊梓喬嗒埋張景淳入屋過夜
去年先加盟星夢娛樂的菊梓喬（ Hana）遇上一姐吳若希大肚生仔，無啦啦攝到位備受力捧，結果在今年《勁歌金曲頒獎典禮》，取代吳若希得寵地位，可以掃走四個獎，成為女歌手中的大贏家。
事業有起色，愛情方面亦有着落，撞啱相識多年，在《天與地》飾演家明的張景淳，同拍拖一段日子的華姐宋雙佳 N度分手，極速攝位由朋友變拖友，早前兩人鬼祟到又一城拍拖睇戲，之後 Hana做埋司機送上門，到張景淳位於將軍澳的住所過夜。
時來運到，事業愛情兩得意，但係怕唔怕向來唔鍾意旗下囡囡拍拖的唱片公司老闆何哲圖唔高興，將她打回原形。
鬼祟睇戲
披頭散髮的張景淳最初單拖在又一城戲院附近徘徊，其間接到電話，九秒九走到商場外，從一架駛過的私家車接過兩袋物品，隨即折返戲院，夾啱時間化行妝，戴上眼鏡的菊梓喬已默默地守候。
張景淳上前同 Hana處理好各人手上的物品，刻意彈開單拖走去買飛睇十點場的日本電影《 22年後の告白——我是殺人犯》， Hana下意識緊隨其後，但男方示意她搵地方「柄埋」，女方無奈走人，先行到自動售票機，遇上有途人經過，慌失失走入 Starbucks，跟住人龍扮排隊，直至有途人跟住自己隊尾，她又無幫襯，走回門外偷望張景淳是否已買完飛。
身世可憐曾被棄養
點睇都唔似三十一歲的菊梓喬，外表似小家碧玉，實質身世慘過粵語殘片，細細個父母離異，在她十三歲那年，父母分別棄養 Hana兩姊妹，要靠社工協助維持生活，最後焗住停學打工養細妹，好幾年要一個即食麵分兩日食，甚至餓暈街頭，但最 hurt還是重遇父母被當成陌路人，「佢哋話無論而家佢哋嘅家人點樣都同我哋無關。」 Hana眼紅紅憶述。
雖然泊到無綫旗下的星夢娛樂出碟，但 Hana頭半年未有歌派台，無工作，自然零收入，幸好有做文職的妹妹撐住，先至捱到今日。最重要是時來運到，遇上一姐吳若希大肚生仔，公司想捧的何雁詩掛住瘟仔，負面新聞多到永不翻身，令轉投新公司只有一年的 Hana執到好籌被力捧，橫掃今屆《勁歌金曲頒獎典禮》。
過夜好熟路
由於男的在電視圈掙扎求存，女的簽約「星夢」只有一年，加上講到明力捧，而且老闆何哲圖經歷過鍾嘉欣同吳若希都忽然大肚結婚打擊，所以唔鍾意囡囡掛住拍拖會影響事業，如果被發現拍拖隨時被送入雪櫃，所以兩人極度小心，十足偷情一樣，凌晨電影散場，他們刻意等其餘觀眾散去才離開，起初兩人保持成個身位距離，但眼見商場人影都沒有才敢愈行愈埋。沿途張景淳從袋中取出一支飲品，自己飲過兩口，順手遞俾 Hana飲，兩人的關係又豈只朋友咁簡單。他們行去商場外準備上張景淳坐駕，他走到車尾箱將手上的一袋二袋放好， Hana就自動波坐上司機位做柴可夫，連車都任由女友揸，他們目標明確向住將軍澳進發，車輛駛到張景淳位於馬游塘村的村口時， Hana轉軚以車尾駛入，明顯熟「架步」，知道村內只有單程路出入，方便日後出車離開。
甩拖即撻着
咪睇 Hana同張景淳一個歌手、一個演員，好似大纜都扯唔埋，查實男方未拍劇前是三人組合 Cheers的成員，私下成日夾 band，同曾經是 rock band主音的 Hana識於微時，兩人一直分屬好友，直至早前張景淳同華姐女友宋雙佳 N度分手，兩人的共同朋友發現二人的關係開始起變化。
「佢哋識咗好多年，都知佢哋好 friend，但係 Stanley（張之洋名）甩拖嗰排，成日見到佢搵 Hana，之後 Hana又搬近 Stanley，仲俾我哋眼利嘅 friend發現佢哋喺 Ig晒情侶錶，明顯有嘢！」張景淳身邊人透露。
「有米富二代」
已經三十六歲的張景淳，家底豐厚，父母經營飲品代理生意，自幼移民加拿大， 03年才回流返港，曾加盟劉德華的「加際娛樂」，與莊嘉敏及陳逸樵組成 Cheer樂隊入行，其後解約加入無綫， 07年參加無綫藝員訓練班後，擔任《東張西望》外景主持，直至 11年，憑住劇集《天與地》「家明」一角彈起，但之後未再有代表作。
感情生活方面，曾與華姐宋雙佳拍拖多年，其間卻被斷正扮單身偷嗒 Hotcha成員 Regen，搞到分手收場，緋聞不絕。
撰文：娛樂組
攝影：陳亦龍、李溢敏、余一駱
|
鍾意就快D Share啦！
|
|
|
