林作
豪語錄
不貼地的貼地
牛津畢業大律師，林作因麥明詩上了娛樂版。
「簡單講，因為係某人男友，所以出名。」他自我拆解。
分手後，林作成獨立個體，宣布不做大律師做喜劇演員，有人問他有何吸引之處。
「只能夠講係化學作用，好多嘢加埋一齊，就會有呢個情況。」他說。
富貴出身，不夠貼地少有接觸基層，沒有機會經歷一個所謂喜劇演員的既定磨練程式。
當你以為林作不曾貼地，他說確實曾經試過，只是游走在兩個極端。
「我覺得自己算係貼地，因為比較了解周圍發生咩事，同埋朋友圈子好闊，咩人都有。
我覺得自己係好極端嘅人，非常之貼地同非常之離地。」
他說。
擴闊視野 想法更深
如果由麥明詩當冠軍數起，林作停留在娛樂圈有兩年多時間。
客串電影、擔任電視節目主持、扮美少女戰士、裸上半身出鏡，近日出現亞視玩埋《百萬富翁》，他認為未算正式加入娛圈。
「今時今日見到各行各業嘅人，運動界好，咩人都走去幕前，所謂娛樂圈，應該唔當係娛樂圈。我無諗過行咩路線，只想行其他人無行過嘅路，至少我夠膽講目前都係。好多人問我究竟想點，有咁嘅問號，代表我行喺正確路上，因為無人係靠抄而成功。」他說。
有能力跟大他一大截陶傑溝通，林作固然有自己的想法，他自認「樣又冇乜，又肥咗少少，唔搞 gag就冇無乜觀眾」，他說：「以我多年討好人，尤其女仔風格嚟講，基本上都係搞笑為主，更加準確字眼係滑稽。」
滑稽的演員都有經歷，由低層做起，依今日的說法，是貼地，接地氣，很難想像住在三千呎豪宅，揸 Tesla潮車，好朋友是四太梁安琪大仔何猷亨的林作能夠體會。
「我覺得自己算貼地，因為比較了解周圍發生嘅事，朋友圈子好闊，咩人都有。我係好極端嘅人，非常之貼地同非常之離地，兩樣都係，我好鍾意去茶餐廳，不只幾次嚇親入面嘅人，我好喜歡嗰啲地方。另一方面，我又好鍾意著西裝打呔去高級餐廳，即飯枱隔籬有幅名畫，所以覺得自己比較極端。我覺得呢種人，可以擴闊視野情況下，諗嘢更深遠，不單在娛樂圈，其他方面都係。」他說。
是否真需要貼地？林作坦言認真分析過：「我覺得要帶啲新嘢俾觀眾，創出人哋唔知又覺得幾好睇嘅嘢，今時今日資訊發達，只係純粹滿足市場需求，已經落後一步。而家市場上要嘅係貼地，接地氣嘅嘢已經有好多，多我一個唔多，少我一個唔少，或者咁講，我只可以做自己，每個人都只可以做自己。」
代表未來 不是過去
轉行創業，豈能欠缺數據支持。
在英國讀書超過十年，對當地娛圈文化了解比較深入，林作覺得可以帶入香港市場。
「明星應該要有一定程度 class，英國係一個頗為左派社會，總係覺得要人人平等，學費平啲，大家有同樣機會，而家幾位做得最好嘅演員，背景上都非常離地，《哈利波特外傳》男主角 Eddie Redmayne、《奇異博士》、《福爾摩斯》男主角 Benedict Cumberbatch、又或者超級英雄系列 Marvel飾演奸角 Loki嘅 Tom Hiddleston，都係背景非常好，讀最好中學，牛津或劍橋畢業，呢個世代受到西方國家熱捧。香港未開始呢樣嘢，我希望自己係代表未來，唔係代表過去。」他說。
林作承認，香港市場仍在玩貼地零距離，敢言直說，代表網民心聲順理成章成為最具認受性藝人。要拿捏做到具星味，又可以跟大眾零距離的演員，他認為是出路之一。
不斷摸索前進，不過在「性侵 me too」事件中，個人立場受到不少人抨擊。
「其實咁多次偉論，今次支持度最高，數據無得呃人，私底下有好多唔識嘅人 inbox我，表示同意我，當中甚至有女人。有唔少人在公開場合同我講，佢哋同意我講法。我嘅諗法代表好多唔敢出聲嘅人，佢哋心裡都係咁諗，所以有時我唔覺得自己咁獨特。」他說。
忠於自己 以牙還牙
他假設是因為天生一副「摟打」尊容，某些人才有過激反應，又例如「狀元醫生論」，他指狀元揀讀醫科是短視，陶傑表達同樣意見，他卻成眾矢之的。
「一位非常親密嘅朋友同我講，如果啲人好鍾意你，個個都覺你好正，我會唔會開心？呢位朋友好了解我，佢講得好啱，我寧願做自己，有自己風格，多過純粹享受掌聲，我確實係一個咁嘅人。」他說。
企硬做自己，對幾乎是近年美國最低民望總統特朗普「以牙還牙」說法，他表示十分認同。
「平時喺屋企鍾意睇書，會向名人取經攞人生經驗。譬如特朗普著作，我唔同意佢嘅為人同政治立場，甚至好多都厭惡，但有幾樣嘢跟緊佢做，其中以牙還牙，當有人做出無理指控攻擊你，無論係咩身份，我更加係二打六，唔應該啞口無言去忍，應該盡情反咬；同埋日子耐咗，無人夠膽蝦你。最初出道俾人攻擊，我會唔出聲，而家會用滑稽方式去覆嗰班癲人，令佢哋哭笑不得，我覺得呢種係好唔錯嘅人生態度，係一種藝術。」他說走搞笑路線的林盛斌（ Bob），是其中一個叫他嘗試去「玩吓」社交媒體，現在反儲了一班支持他的人。
無論遇到什麼事，都要懂得如何享受。林作收放自如，全因背後有個像朋友的林母力撐。
「我哋一齊會度好多嘢，好難得，阿媽嘅風格造就我性格，我唔知好唔好，多得佢敢言又放膽，佢話俾我聽，其實冇嘢需要驚，做人要敢於行動，佢呢方面影響我好多。我係一個幾有安全感嘅人，包括對另一半都係，我成日都笑好多香港男仔，對另一半信任唔夠，係源於自信不足，我唔算自大，純粹有自信，所以就算唔識，都會頗安全去做，呢啲同媽咪好大關係。另一方面，我覺得係學校教育，以前嘅我冇自信，係一個無嘢講嘅人，中學開始去英國讀書，所有證書喺英國考返嚟，幫到我好多，好彩我係一個兩面兼顧嘅人，中西都理解，唔會側重一邊。」他說。
麥明詩
「我冇承認過同佢拍拖。」
馮盈盈
「我識佢，我認為佢係史上最美麗港姐。」
跟崔碧珈玩百萬富翁
「知道同佢拍檔，已經成晚瞓唔着覺，佢真人同上鏡一樣咁靚。」
問林作關於女朋友、女藝人……，不詫異他故弄玄虛。或者只有以下一段說話出自真心。
「我覺得話追女仔係對對方一種禮貌，講一啲比較討好嘅說話，係希望大家開心，娛樂吓大家咪幾好，女仔無邊個唔鍾意聽，讚美同性騷擾係兩回事。」
撰文：歐陽慧芯
攝影：黃志明
Leather jacket look：@bauhaus_hk
Hip hop look：@sugar005official
|
鍾意就快D Share啦！
|
|
|