（左至右）民協老將馮檢基、民主黨袁海文及 DQ六之一的姚松炎出戰九西，各不相讓。
壹號頭條
九西老中青最後攻防戰
政府褫奪六名立法會議員資格引發的補選，將於三月十一日舉行。
九龍西泛民初選，由民協老將馮檢基、 DQ六之一的姚松炎及民主黨袁海文出戰。
被稱是爭奪「政壇關愛座」的馮檢基強調，現時非堯舜年代，由皇帝指定接班人，即使他參選，不代表其他人要讓路，「我讓俾袁海文都唔得㗎，姚松炎出都要大家競爭。」
又認為資深議員較易看穿政策的魔鬼細節，健康的政壇要有老中青三代。
姚松炎則表明，講年齡或年資「都係危險」，重點是議政方法有效，才能說服選民；他轉戰九西是希望帶動「四席全贏」，為民主派守住關鍵半數議席，「件事關乎好重大嘅香港前途問題，唔可以當俾啲後生仔訓練。」
年紀最輕的袁海文同意自己缺乏知名度，但強調願與各界溝通，加上比姚教授有更豐富地區經驗，揚言「議會抗爭冇局限」，希望以態度取勝；他也質疑基哥一心想保住議席，上次參選立法會已「令大家輸得好慘」。
為了下週日的初選戰，老中青三代正磨拳擦掌，作最後準備。
前年落選立法會後，馮檢基接受《壹》仔訪問，指民協要「翻箱倒槓」找出落敗原因，一年多後他「交功課」，指第一敗因在於選舉兵分三路，導致分薄資源和人手，另一問題就是未充分運用網絡宣傳。來到今次初選，他稱資源「係咁多就係咁多」，不過網絡攻勢就聘請顧問公司襄助。
六十四歲的馮檢基想重返九西，外界普遍不予好評，左一句「永續參選」，右一句「霸住個位」，罵聲不絕，他也承認去年初透露有意參加補選時，負面留言「幾百幾百（個）咁樣入嚟」。上月底其 fb專頁上載一條短片，由他親自回覆網友問題，他表示以往連老豆老母也一併被罵，最近指責比以前客氣，「依家差唔多鬧剩一樣嘢：做乜唔俾機會後生仔？」
本無關愛座
政壇關愛座？被問到如本土派選民不支持民主派初選當選者該怎辦，
馮檢基表示，只能盡量說服更多人認同、參與初選機制，「如果樣樣都可以保證，乜都係 ABC， A一定去 B， B一定去 C嘅話，你咩都唔使做，求神拜佛搞掂。」
代，堯讓位俾舜，舜讓位俾下一個，由皇帝指定接班人。」馮檢基強調即使他參選，也不代表其他人就要讓路。「我都要打㗎喎……我讓俾袁海文都唔得㗎，姚松炎出都要大家競爭。」
他以胡惠乾和方世玉的故事作例：一個為家人復仇心切，沒打敗少林十八銅人，就鑽狗洞離開少林寺，結果報仇不成，反被打得落花流水；一個學成後「師傅都打」，昂然下山。「我覺得啲後生應該做方世玉。你要出選，你咪喺會入面嘅機制打出嚟囉。」又強調縱使民協內部初選只有他一人報名，都要取得逾三分之二信任票，方可代表民協出戰。
在立法會被「滅黨」，加上民協前主席莫嘉嫻、六名區議員等先後離開民協，被嘲是「雪崩式退黨」，馮成為眾矢之的，被插黨友離去跟他執意參選有關。他反駁指，六名區議員中，除了九龍城區議員黎廣偉及蕭亮聲加入民主黨，另外「四散人」都有協助他參選。「如果佢哋憎馮檢基、嬲馮檢基，甚至乎唔支持馮檢基去參加今次補選，點會離開民協之後，返嚟幫我助選？」又透露一度有意落場「拗手瓜」的深水埗區議員何啟明，現擔任其助選團長。截稿前一日，據報導民協深水埗區議員鄒穎恒又過檔白鴿黨。
老將打中場
馮檢基在多個初選論壇都自稱「中場」，於記者面前也強調自己和民協負責組織工作，瞻前顧後，「我哋輸送一啲機會俾打前鋒嘅去攻人哋，當人哋攻嘅時候，守住個龍門，確保人哋攻我哋唔入。」
他表示，很多民主派資深議員已不在立法會，「其實我覺得一個健康嘅政壇，就係老中青都有。」資深議員較熟書，容易看穿政策的魔鬼細節。如去年的《施政報告》，外界集中討論交通津貼，但馮檢基指真正問題在於置業主導政策。「我聽完《施政報告》，第一時間就講：林鄭大右轉……樣樣都賣賣賣賣賣，完全係傾向發展商發展，多過市民住嘅問題。」如他成功重返議會，而一地兩檢本地立法草案已提交立法會，又如何應對？他只道：「到時再同其他民主派議員一齊傾。」
或許問題不在年齡。一○年馮檢基還在立法會，代表民協支持政改方案，使他和民主黨受千夫所指，五年後另一次政改博弈，他被點名為轉軚高危分子。不信任的種子早已埋下，「中場說」又如何取信於市民？他說事件已成歷史，「除非佢認識嘅唔係事實，咁我就覺得要解釋、澄清，但如果佢認識嘅係事實，佢接受你就接受你，唔接受你就唔接受你。」
有初選 好過冇
馮檢基稱今次初選勝負是次要，有助民主派團結，意義更大。「肯坐埋一齊本身已經係一個團結，而又傾到一個機制，搵到一個人去選，贏到，去參與補選，係第二步嘅團結層次。」他以前未跟姚松炎碰面，也未詳細了解對方想法，但經初選連番較量，加深互相認識，亦方便選後合作。
訪問當日，社區網絡聯盟發言人劉頴匡宣布，有意繞過初選，直接出選新東。「佢又話得到青政支持，依家佢出嚟，所以任何一個區都可以有咁嘅情況。」直至上星期，沙田區議員陳國強亦有意直接參加新東補選，「維園阿哥」任亮憲也表示考慮參與港島區補選。不過馮檢基堅持，辦了初選，好過不辦，「如果你唔做嘅話，永遠每一次立法會選舉，都 N個團體走出嚟，惡性競爭，仲大件事！」
「只論年資好危險」
「我覺得講年齡或者年資都係危險。尤其是嗰種（議政）方法唔得，而你又話我有年資所以掗住個位……你嘅方法係唔得嘅，說服唔到選民，選民都唔鍾意呢種議政方法，你就話我年資夠深，所以一定要留喺度，最尾其實會輸。」
「應該講，你嘅議政方法係咪有效，如果有效就會說服到最多選民支持你留低，係咪？如果個議會要抗爭，要捱夜要開通宵，後生會好啲添，或者應該講身體好嘅好啲。當然我都同意譬如議事規則，可能你做過幾屆會熟啲。但畢竟議事規則又改咗，所以以前嘅經驗都冇用。」姚松炎說。
決心從政前，姚是中大地理與資源管理學系副教授。雨傘運動後，他和同道中人成立「社區公民約章」，原意支援年輕人參政，「從而贏返香港」。但多次提出邀請都吃閉門羮，他決定身體力行參選立法會，證明政治可以「好玩」、「有意義」。贏得功能界別議席固然令他鼓舞，豈料不足一年，就失去所有。
危機感
政府宣布四議席補選安排後，傳媒一直密切留意姚松炎會否出選，曾一度傳出他將再戰建築、測量、都市規劃及園境界，又或不再出選，最終他在初選截止報名前一日宣布參選，更獲前民主黨成員區諾軒及社工曾健超「讓路」。
「之前雖然都有啲醞釀，但我同佢哋（民主派）講，如果有人喺地區直選可以擔大旗，其實我喺番建測規園界出咪得。但到截止報名前幾日，佢哋覺得唔對勁。」民主派會議上，有人憂慮已宣布參加初選的候選人政治影響力不足，未能帶動「四席全贏」。
以被 DQ議員身份出選，姚希望號召更多市民在補選日投票，以選票控訴政府，助民主派守住關鍵半數議席。
他深感參選人和市民危機感不足，才在一日內作出如此重大決定，「三個地區直選一席都唔輸得，輸一席都守唔到半數，冇咗否決權廿三條照過，議事規則照過。所以當時評估，今次唔可以掉以輕心，唔可以當俾啲後生仔訓練，我覺得咁樣好似太兒戲，件事係（關乎）好重大嘅香港前途問題。」
空降
短短議政九個月，姚松炎認為可見其「專業議政」行之有效。他曾多次揭發政府呈交立法會的文件失實，如高鐵回報率被嚴重高估、港鐵沙中綫存審計漏洞等等。
但他突然空降九西，最受質疑的是缺乏地區工作經驗。他回應稱一直有做地區工作，例如以港島南區置富花園居民協會副主席身份，在屋苑推行「四零方案」，推動節能減廢。惟此亦非在九西地區工作，他指自己曾在長沙灣上學，住在美孚三十多年，故熟悉該區。
不過「接 case」應付居民投訴，其實也非姚議辦的風格。「如果一個立法會議員將大量精神、時間、資源，擺落地區工作，其實你就會變成區議員。」他提出「三層聯繫模型」，立法會議員專責留意全港跨區政策及監察政府，「喺議會做好把關，聯繫國際，引起國際關注，呢啲區議員做唔到。」
至於不可忽略的地區工作，則透過主動聯繫區議員及社區服務組織，「形成一個聯盟。」立法會議員從組織得知地區需要，可提出相關議題，由組織做前線工作；社區服務組織亦需區議員支持，立法會議員就可協助聯繫；區議員與組織合作，一來服務街坊，二來對其選情亦「有利」。
最大公約數
姚松炎一直打着「最大公約數」旗號，此稱號其實是港大社會科學學院講師丘梓勤，接受《 852郵報》訪問時為他而起，姚亦欣然接受，「佢嗰句好精警！『不同光譜及不同階段的最大公約數。』好好用……以前我哋要解釋我哋同多個板塊友好，講一大餐，依家 HCF就搞掂。」
身為 DQ六議員中唯一出選的人，丘梓勤曾指因此姚在政治倫理上容易受各派支持，而且本身與泛民黨派友好，又因他是專業人士，較易獲中產選民支持。
但他轉戰九西，民主派於建測規園界會否因而失守？姚解釋：「前年特首選委選舉， CoVision派廿五人出嚟，贏晒廿五席，頭廿五名最高票數，而且佢哋個得票率仲高過我。」當時民主派在該界別中，由上屆只有三十席中的一席，颷升至二十五席。其中獲最高票數當選的區議員司馬文，更獲二千五百二十四票，比姚在立法會選舉所得的二千四百九十一票還要多。
「到時佢（民主派代表）又贏到我又贏到，其實我哋將會有兩個建測規園界嘅人入去議會，代表業界，其實咪有 100%嘅增長，係咪？」
議會抗爭冇局限
「佢（馮檢基）好多決定令人有好大疑問同質疑，例如上次點解堅持去新界西（參選），臨尾明顯唔會贏到，都唔肯放低自己幫番九西民協嘅朋友保住議席，令大家輸得好慘，民協自己都輸得好慘。」民主黨袁海文雖表明尊重「基哥」長期對地區工作的承擔，但同時亦狠批他。
剔走馮檢基
選舉前有多個場合讓三人較量，電台節目主持問過，若候選人自己身故，會支持哪一位對手參選，袁海文當時選擇姚松炎。
今次也要他回答假設性問題，讓他剔走一個對手，他想了半秒便回答：「剔走馮檢基。」原因是以大局為重，「個人嚟講，剔走姚教授一定係好嘅選擇，但初選梗係想最有競爭力嘅候選人出嚟，貫徹初選原則，唔會因為你勁啲就剔走你，咁亦係自己學習同歷練嘅過程。」
要突圍而出也不容易，袁承認知名度最低，強調會在社交媒體與不同場合加強政策論述，令更多市民認識他。兩週前，香港電台節目《城市論壇》上，也見他以觀眾身份提問，增加市民認知度，是他首要解決的問題。
本身是特許財經分析師的他多番強調，他的優勢是擁有財經專業背景，對比同樣有專業背景的姚松炎，他先禮後兵，讚揚對方「好清晰係好專業，監督政府方面都有佢嘅能力。」但指姚不如他般對九西地區有長期承擔，「點解佢唔留番喺規劃界別去選呢，嗰度佢最大勝算，（冇）長期地區承擔，我相信佢要同九西選民解釋。」
「咁本土咁右」
姚松炎具有「最大公約數」的特質，袁海文又有何能力團結泛民？他思考片刻後，道出自己信奉的對人處事態度，「我係好願意同唔同人、唔同光譜嘅人接觸同溝通，唔會話你呢個我一定唔會傾。」
以本土派為例，他指出：「其實我係好唔認同佢哋嘅行為啫，例如支那前支那後啦、有好多好無謂嘅行為去衝擊，呢個對佢哋實踐理念，其實冇實際作用。」他引述會計概念「 substance over form」，指自己一向「着重實際多於形式」。
不過，其實他都支持不少本土派政綱，「例如能源自主、水資源嘅開拓、人口政策係咪要收緊。」袁海文形容甚至有黨友批評他「咁本土咁右」，但他不會說自己「好右」，「因為我讀經濟、財經出身，好實際睇個問題，好着重操作性，你問我要團結本土，我諗更加緊要係點樣落實佢哋諗緊嘅嘢，喺爭取民主大道路上，一齊去做多啲。」
橋牌中節節敗退
假如真的能夠進身議會，袁海文強調在議會抗爭無局限，「我唔會有好多 limitation俾自己，當然有啲底線我唔會 violate（違反），譬如一定唔可以傷到人，同埋唔會對整體效果有更大破壞。」他說會衡量風險和後果，只要是有「正面影響（ positive impact）」的抗爭方式，他都會去做。
中學時期是橋牌校隊代表，袁海文說要贏出比賽，就要評估好自己、同伴和對手實力，「大家一路溝通點做，一個一個小成功咁去做……因為橋牌唔係打一盤，一打可能打八盤、十二盤、六十幾盤，咁先係一個大勝利。」
以橋牌比喻現時政局，他認為過往一段時間，特別是由梁游被 DQ開始，引致釋法令議員議席被褫奪，議事規則被衝擊，「係一個好大嘅節節敗退」，故現時最緊要是在補選中站穩陣腳，「一定要贏番分組點票過半數」，再逐步在其他不同小場合取勝，才有望贏回大局。
態度決定高度
袁海文一直強調其財經專業如何有優勢，有「美容專員」稱號的他，也以跟進美容個案為例，指自己不單會陪同苦主現身開記招追討公義，更有能力「將一堆上市公司（資料）分析出嚟……睇佢哋年報，甚至銀行戶口」，從而像早前揭發「套票過期」等問題，「我喺呢方面正正好有能力，幫啲苦主做得更加多。」
自言為人理性，也「鍾意睇報告」的他若成為代議士，「我諗我會係林卓廷嘅（抗爭）形式多啲；但工作上，我諗同唔少專業議政嘅朋友，嗰種方式或諗法會更加似，係一種 combination（組合）。」
面對兩名分別具備能力及年資的對手，袁海文引用他的座右銘「 It's attitude but not aptitude that determines your altitude」回應：「即係你嘅態度，而唔係你嘅能力或者資歷，去影響你個高度。我覺得從政、為地區或者民主運動付出，最緊要都係個態度。」
撰文:鄭語霆,劉卓瑩,李啟發
攝影:李育明,胡智堅
|
鍾意就快D Share啦！
|
|
|