希瑪眼科上市後五日間升六倍，林順潮（左四）身家大漲百億，不少散戶心郁想高追，熱炒程度直逼騰訊和港交所。
中環人語
眼科股東「音樂椅」
醫生股希瑪眼科（ 3309）上場，嚇親街坊。先係有一堆大孖沙，如新地（ 16）主席郭炳聯、騰訊（ 700）主席馬化騰、 Esprit（ 330）創辦人邢李㷧等捧場，孖展超購一百八十五倍，招股價兩個九，第一日升到五個幾，散戶出晒貨，原來已入強人手。大戶想升幾高有幾高""九蚊、十五蚊，最高升到十九個九!林順潮身家賬面一度高達一百四十三億元。
睇番啲持貨券商，暴露咗行蹤。先係滙豐、中銀、恒生增持，包銷行招商證券、大摩、輝立減貨。之後各券商持貨依然波動，招商、大摩兩間持股最多嘅券商不停減持，中銀香港最後爬了大摩頭，升到第二位。
一六年翠如 BB股聯旺（ 8217）半年升百倍，被證監盯實，呢幾年已少見爆升股。今次希瑪眼科現身，對市況又有無玄機?
菲傭「二五女」
鷹君（ 41）羅家爭產風波，由羅老太搬離羅家大宅，暫住富豪酒店開始，身邊子女明顯分成兩派。嗰種壁壘分明同計算，連羅老太的貼身家傭，都捲入其中。
話說羅老太一直想炒滙豐呢個家族信託受託人，事件已進入司法程序，而喺羅老太身邊服侍咗十年的菲傭 May姐，突然話補錢離職，被揭發原來走咗去對家做滙豐證人。 May姐本來唔係叫 May姐，只係羅老太順口叫開。佢曾為羅老太推輪椅會見傳媒，羅老太更同對方講話， show了幾句流利英文。以為女傭唔識中文好安全，點知依家啲菲傭姐姐識偷聽錄音！羅老太透過身邊人話，覺得震驚又憤怒，每日被監視、錄音，搞到佢老人家好驚，無晒安全感，更加大呻「無陰公」。搵菲傭做證人，手法係天外有天；有損形象，值唔值得？真係見仁見智。
幟哥落鑊
幟哥煮鮑魚，公認頂瓜瓜，炒嘢拋吓鑊又得唔得？佢隻龍皇集團（ 8493）上星期二上市，係喺咁多升咗嘅新股中，仍然未開着火嘅爐頭，散戶仲有機。
話說幟哥老豆都係廚房出身，做到美麗華酒店總廚。幟哥七十年代開始學廚，○五年上亞視，○九年上無綫做飲食節目主持。仲做埋馬主，有隻「為食仔」，又同張宇人、鍾偉平、楊貫一組織咗個「好食團體」，分別擁有「好好食」、「好食德」、「食得好」三隻馬。不過幟哥都唔係一帆風順，早年去澳洲做廚，放工就去賭場，輸到妻離子散、賣兩層樓再問老豆借錢還賭債。九二年返香港洗心革面，東山再起喺利苑做總廚還錢兼儲錢，一三年用儲落嘅百幾萬開龍皇酒家。話過唔再賭錢嘅幟哥，今年將公司上市，剛剛開局，人生下半場，會否好似林順潮醫生咁有百幾億紙上身家，就睇呢一鋪。
|
鍾意就快D Share啦！
|
|
|
