趙學而
豪語錄
24年來的最佳位置
88年參加新秀的趙學而，有過不少大熱代表作，今年 4月，終於踏上紅館。
不過，沒有想過要勁歌熱舞，純粹以歌會知音，「自己無信心去做嗰件事，我又唔係載歌載舞嗰類型歌手。」
收到，明白。
入行 24年，現在是趙學而的最佳位置，至少，乜都由自己話事。
二零一六年已入紙申請
入行二十四年，趙學而雖然沒有大紅大紫，但卻是不少人那些年愛過支持過的歌手其中一位，今年四月二十八日，她會在紅館舉行《 Right on Time演唱會 2018》，可喜可賀！「好多謝主辦商，因為○八年開始，佢哋已經想幫我喺紅館舉行演唱會，當時曾經同傳媒講已經推過好多次喺紅館開騷嘅機會，因為覺得當時自己未有咁嘅心理狀況可以應付得到，始終太耐無唱歌，啱啱出番嚟嘅時候覺得需要啲時間，俾自己去接受番呢個唱歌圈子，亦需要俾觀眾更加多時間認識番唱歌嘅趙學而。」一六年，趙學而在九展開了一場《我趙學而演唱會》後，主辦商已即刻為她入紙紅館申請檔期，結果，等了一年才批。
不是載歌載舞類型
四十五歲的趙學而，要應付紅館個唱並不易，亦先旨聲明，不會有勁歌熱舞，「熟悉我嘅人都知道，我係一個唔識跳舞嘅人，亦都講過盡量唔會喺自己嘅演唱會跳舞，既然自己無信心去做嗰件事，我又唔係載歌載舞嗰類型歌手，所以不如專心啲，練好啲把聲唱好啲歌。」趙學而出過四張發燒碟專輯，賣開靚聲，純粹以歌會知音，對她來說並不難。香港歌手開演唱會，請嘉賓幾乎是例行公事，趙學而有了心水人物嗎？「其實心裡面有好多嘉賓，有啲合作過，有啲無合作過，我都好想開口叫人哋嚟撐吓我，但喺過往日子裡面，喺網上都問咗好多唔同範疇嘅人意見，有好多聽眾、觀眾，或者我嘅粉絲，佢哋都想我自己唱晒，即係唱我自己嘅歌之餘，唱吓人哋嘅歌，又唔想有其他嘉賓，所以喺揀嘉賓方面都係一個幾困難嘅事情，到而家呢一刻我哋都仲未落實究竟有冇嘉賓。」趙學而翻唱別人的歌很到位，特別是她翻唱草蜢的《失樂園》、陳慧琳的《最佳位置》，很有自己的個人風格，聽落，筆者認為甚至乎比原唱者更好聽。
希望老公少說話
一一年，趙學而與圈外的建築師男友 Alan So結婚，對於自己即將開騷，老公怎樣支持？「老公嘅支持就係盡量少說話，多做屋企嘅事，佢幫輕到我，喺屋企處理家庭事宜，變咗我自己多咗時間可以休息，可以諗吓究竟個騷應該點，或者處理自己嘅思緒、思維、情緒同埋身體去應付個騷，已經係一個好大嘅幫助。」結婚 7年，有沒有認過生小朋友？「我諗順其自然啦，暫時都好開心地做緊自己喜歡嘅事情，有啲嘢真係講唔埋，可能遲多幾年突然間好想要，咪再決定囉。」趙學而指自己對生小朋友有點壓力，認為現今的社會風氣及教育方式，會對小朋友及大人感到辛苦，所以，在有選擇之下，她覺得養寵物一樣開心、滿足。
負資產
趙學而唱而優則演，在演員生涯上，她亦有《皆大歡喜》為代表作，○一年至○三年播完古裝
版後，緊接○三年至○五年播《皆大歡喜》的時裝版，她說那時候是她入行以來最忙的日子。「一個星期拍七日，星期一至五拍廠景，五六日拍外景，有時無外景我就預早請假，星期五一拍完廠景就直接北上大陸，唱完第二朝早就拖住喼返嚟埋位拍外景，有時要飛去美國嘅話，逗留喺美國境內係唔夠二十四小時，一落機彩排，跟住夜晚唱完，然後就執包袱搭飛機返嚟。」日踩夜踩，忙到不知幾點，只因當時的她是負資產，要搏命搵錢，「因為 run着咗副摩打，一路去一路去做嘢，淨係覺得需要工作，需要錢，因為嗰時負資產，所以一定要搵錢，同埋最開心係成班演員一齊嘻嘻哈哈，開心地過每一日，雖然負擔係好大，但搵錢過程係開心嘅。」趙學而說。
沒工開搞到有情緒病
當年，趙學而日日為《皆大歡喜》開工，拍足四年多五年，直到劇集播映完畢，沒有工開，合約又滿，行足多年的摩打突然煞停，令到她要擔心生活，情緒出現問題。「突然拍完之後，合約又滿咗，跟住又無其他工作，之後處理唔到自己情緒，因為突然間好似好空白咁，好空虛，亦都好渺茫，乜嘢都睇唔到，嗰時情緒病開始出嚟，唔係自己想停，係時勢令我要停，令我身體同精神都要停。」幸好當時 Alan在她身旁，沒有工開，還有個可倚靠的膊頭，「其實佢喺我身邊幫唔到乜嘢好大嘅忙，第一佢唔了解我哋呢一行節奏、運作，第二佢都有自己工作，第三就算我點樣解釋，或者要求一啲呵護其實都係無用，因為要自己解開心結，所以佢喺我身邊，我覺得有個依靠嘅地方已經好足夠，其餘嘅嘢係需要自己去面對處理。」趙學而說。
體重跌到
情緒病令趙學而的體重跌到只得八十幾磅，令本身已很瘦的她變得憔悴，照鏡見到自己都驚，「食咗年幾藥，之後發覺自己身體狀況好似唔係好頂得住，體重跌到八十幾磅時，就發覺唔得喇，唔可以再係咁，唔再食啲藥，要靠自己爬番起身，我嘅問題唔係喺啲藥嗰度，問題係喺心裡面，所以要自己去面對，就的起心肝所有藥都唔食，要爬番起身，出去見多啲人，因為其實嗰時個負面情緒係好怕見人，人哋每講一句嘢我都會覺得係咪講緊我，嗰一刻我望住塊鏡，呢個人好似一個骷髏頭骨，我平時已經瘦，再加上瞓唔到覺，食唔到嘢，嗰一刻望住自己都驚，所以就決定要爬番起身，搵咗啲最親密嘅朋友，逐少兩三個兩三個，慢慢令自己可以見番多啲人。」當時，碰巧黃偉文找她重唱《最佳位置》，趙學而趁機再逼自己向前行，她說：「去幫 Wyman錄《最佳位置》時都食緊藥，我會覺得好挫敗，唱咗幾十個版本，都好似唔係好達到嗰個要求，質疑自己係咪從此唔識唱歌，到呢一刻擔心連搵食工具都好似唔得，所以就決定一定要起番身，如果唔係以後行唔到落去。」當年她翻唱了《最佳位置》，將樂迷久違了的趙學而帶回來，她翻唱的版本，得到很多樂迷的支持，很受歡迎。
性格硬頸沒有放棄
經歷過人生的低點，戰勝了抑鬱症，趙學而因為性格硬頸，所以從來沒有想過放棄生命，「因為我好硬頸，我覺得咩嘢無晒都唔緊要，就算銀行戶口得個零都唔緊要，我仲有條命，我仲有對手。」眼前的趙學而，可以笑住講過去活於黑暗的日子，證明她真的完全康復，斬釘截鐵表示不會再行回頭路。「其實好難行番轉頭，好難會用番嗰個思維去諗嘢，因為已經無乜所謂，開心地面對所有嘢，有咩難關過唔到，無錢咪使少啲，我而家都無屋，負資產又賣咗，租屋都可以住㗎，你覺得呢度租貴，咪搵過平啲嘅租囉，因為其實選擇有好多，只不過你願唔願意令自己心情配合得到，呢個世界無乜嘢係無方法解決。」趙學而說。
不能再錯過的遺憾
趙學而的大熱代表作很多，筆者隨口講都講到多首，《每隔兩秒》、《尋開心》、《我恨我是女人》、《自欺欺人》等都是筆者的心頭好，聽足多年至今仍在手機的播放單上。 16年，筆者已錯過了她在九展舉行的《我趙學而演唱會》，當時有點遺憾，幸好， 4月她會在紅館舉行《 Right on Time演唱會 2018》，今次真的不能再錯過。
撰文：海 山
攝影：黃志明
化妝： Gabbie Lee
髮型： Pakho@ POPEIGHT
服裝提供： YLYstudio
|
鍾意就快D Share啦！
|
|
|
