香港人認識謝玲玲，是因為她是「林家永遠新抱」，林家是指林百欣家族——她是林建岳前妻，為林家誕下五個仔女。林百欣二太余寶珠女士認定她是「永遠新抱」，本月初謝玲玲舉行畫展，已屆92歲高齡的林老太親往支持。
這位林家永遠新抱，近年活躍藝術界，變成一個畫家。但回帶到60年代的台灣，謝玲玲之所以為人所識，是因為她是一位童星。
謝玲玲七歲入影圈，頭兩齣戲《婉君表妹》、《我女若蘭》已跑出，獲得金馬獎最佳童星獎及亞洲影展，被封為天才童星；少女時代拍過中視劇集《親情》、《一縷雙思情》、《雨夜花》等，不止紅遍台灣，而是整個東南亞。
原名謝正陸的謝玲玲，九姊弟中排第六，對上有五個家姐，對下還有兩名弟弟及一名妹妹，五官生得精靈趣緻，被鄰居推廌參加童星電影招考。她笑言：「我對眼好大，以前有個明星叫林黛，好大對眼嗰個，嗰時佢哋個個叫我『小林黛』，啱啱嗰時中央電影公司，台灣第一次將瓊瑤女士小說搬上銀幕，叫《婉君表妹》，要招考童星，鄰居幫我報咗名。」
之前袁詠儀說，參選港姐是因為從小大家都讚她漂亮，但「究竟我有幾靚呢？」靚靚於是去驗證一下。謝玲玲呢？是鄰居代她報名。
去到片場，好多小朋友等住去interview，導演李行話：「唔使，就係呢個妹妹仔！」妹妹仔就是指謝玲玲：「我細嗰時候眼好大，嗰陣時係好得意。」
從千多名小朋友中脫穎而出，謝玲玲第一部戲飾演一個楚楚可憐的孤兒，之後《我女若蘭》就飾演一個患有小兒麻痺、跳芭蕾舞的女孩。
小小年紀做慘情戲，到底如何入戲？謝玲玲全憑想像，想像自己那位留在大陸，未能一家團圓的大家姐慘況，培養情緒。
做童星即跑出，做了小明星的她，一邊讀書一邊拍戲。返學都有少少特權，就是獲校方批准留長頭髮。那時校方要求全校學生要蓄短髮，剪到齊耳，但謝玲玲因為要「連戲」，獲恩准「刀下留人」。可是一回到家，就一視同仁：「我父親教育我哋，一定要做好謙虛，所以呢方面我幾好，不嬲都唔會覺得自己好了不起，好紅，從來都唔會。打架嗌交都係鬧，屋企好傳統，長幼有序，我哋好尊重家姐，要聽家姐話，父母唔會特別就。」
謝玲玲的演藝生涯，說長不長，說短也不短。七歲入行，但真正全身投入拍戲拍劇，是19至22歲那四年黃金時間。23歲就息影，嫁給林建岳做豪門媳婦。一生人好像只打過一份工，就是演員。
《婉君表妹》是1965年作品，謝玲玲飾演婉君表妹的童年時代，她笑言被人叫了五十多年「婉君表妹」——回憶當時片場生活，在片場做功課，戲接戲冇覺好瞓，試過三日三夜不眠不休。成名當然有得有失，謝玲玲說：「我覺得係見得人多，但冇咗自己童年時候，冇得去玩。有少少……但唔會覺得遺憾，teenager出去玩嘅時間，我冇咗呢樣嘢，好似依家嘅蘭桂坊，我真係冇去，因為一路都拍緊戲，好彩我有好多兄弟姊妹，所以我一路都唔會覺得遺憾，或失去咩，我都好滿足同我啲兄弟姊妹一齊。」
謝玲玲慶幸自己生於台灣電影、電視界最好、最蓬勃的時代，當時盛產了「雙林」——瓊瑤電影時代的雙林：林鳳嬌和林青霞，還有秦祥林、秦漢等明星，亦曾與林青霞、甄珍等合作過，但合作不多，因為謝玲玲當時主力拍電視劇。
當年「雙林」先後嫁到香港定居，謝玲玲亦是：「喺台灣嗰陣見時間唔多，各自忙開工，佢哋當時真係好多戲拍，反而嚟到香港見吓。青霞有時會見吓，個女同邢嘉倩係好朋友，世界好細，依家好似見返以前嘅朋友。」
問到她有否與影星相戀，她就笑言：「我嗰時接觸冇咁多，同埋我自己家庭好多兄弟姊妹，夜晚去玩吓蒲吓都冇咗嗰個年代，可能自細有啲名氣，比較框住自己，媽媽又有少少將我框住，多數同屋企人一齊，拍完戲就返屋企。」就是因為有謝媽媽自小照顧，出入陪開工，故謝玲玲眼中的演藝圈，是比較簡單的：「取悅導演有好角色？完全冇。我就自細拍戲，有乜嘢都係媽媽帶住去傾，我同導演、製片都唔熟，簡單好多好多，唔使去應酬，因為自細有啲名氣，大個咗啲人就係因為我有名氣而搵我。」
【閃耀人生女人心——袁詠儀】
http://bit.ly/2G5Oale
【閃耀人生女人心－琦琦】
http://bit.ly/2HMJnmK
【閃耀人生女人心－張天愛】
http://bit.ly/2HHurFq
採訪：梁錦雯
攝錄：葉君海
攝影：林德雄
場地：Beefbar
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|