夠 man嗎?（設計對白）
探熱針
郭子豪 45日谷爆肌
去年拍《親親我好媽》飾演學生「籃球王子」彈出的郭子豪，在無綫鬧小生荒時備受力捧劇接劇，近日他演出的《三個女人一個「因」》及《翻生武林》同時播出，好有人氣。最近為 Big Big Channel主持健身節目的郭子豪，身形比之前大隻了一倍，原來他早前搵來好友趙勁皓（ King）做幕後軍師，在短短四十五日谷爆肌。
想做大隻爆肌男
四十五日可以變成怎樣？郭子豪示範俾大家睇，由大隻仔變成超大隻的爆肌男，令他更有台型， man爆！「 Arnold玩開健身，本身身形已經好有睇頭，不過佢想實淨啲爆晒肌，原本有健身中心贊助佢做運動，加上幕後軍師係老友阿 King，兩邊齊齊操，飲食又有專人控制，所以用咗四十五日就爆晒肌， fit到可以參賽。」知情者說。
紅褲仔出身
King與郭子豪兩位肌肉男因為替品牌 A&F紅褲仔宣傳而認識，「一二年 A&F香港分店開張， King係香港代表，同其他外地男模著紅褲仔做宣傳，而郭子豪當年打低好多人，喺英國獲選中成為 A&F首位亞洲男模，為品牌做世界巡迴宣傳 model，香港分店開張，佢有份撐場，就係咁識咗 King。兩個舊年拍邵氏套網劇《飛虎之潛行極戰》撞番，因為大家都鍾意運動，愈來愈熟落。」有知情者說。
同黃智雯有床戲
入行三年的郭子豪外形好又靚仔，去年拍《親親我好媽》飾演學生「籃球王子」終於彈出，近年無綫鬧小生荒，好得監製歡心，好快劇接劇，戲份亦愈來愈多，「而家播緊嘅《翻生武林》係兩年前拍， Arnold戲份唔多，只係做純真派弟子其中一個，之後拍嘅《三個女人一個「因」》， Arnold已經同女主角黃智雯有感情線，仲有唔少親熱床戲。佢舊年拍咗《棟仁的時光》同埋《跳躍生命線》，而家又拍緊《包青天》，算係好多機會。」有知情者說。
讀英國名牌大學
一四年入娛圈，讀完藝訓班簽做親生仔的郭子豪，不單有樣有身形，學歷亦唔輸蝕，中小學就讀喇沙，之後到英國入讀全球排名十大的 Imperial College London修讀機械工程畢業。郭子豪曾於演藝學院修讀導演課程學剪片及製作，一年前自己成立了 take7製作公司，幫過馮允謙拍過微電影《年月匆匆》。
健身界 star
中大畢業的 King，讀大學時已經半工讀，教健身又做 bartender、 sales等，成功不靠父幹，一三年入行出過寫真集、拍過戲，再轉型做生意，現擁有兩間 King's Fitness、兩間京菜店，又與陳柏宇夾份開酒吧及麻辣火鍋店。 King於過去兩年都有參加本土健美比賽，更是冠軍人馬常客，是健身界 star！
撰文、攝影：娛樂組
|
鍾意就快D Share啦！
|
|
|