張建聲指係佢太專注事業而忽略了身邊人。
早前於網劇《反黑》飾演招積一角嘅藝人張建聲去年5月承認與同公司藝人陳嘉莉（Kelly）拍拖，一直表現恩愛，2月農曆新年時二人仲拍拖到維園年宵攤位開檔，嗰時張建聲仲話儲緊老婆本，問Kelly願唔願嫁畀張建聲時，她都甜爆話睇佢乖唔乖再考慮。
估唔到事隔兩個月，張建聲啱啱喺社交網上載與Kelly合照，並發文宣布同對方已經分手一段時間，仲透露原因係佢太專注事業，長文如下：「跟大家說一聲，我們已經分開了一段時間，原因是我太事業心重而忽略了身邊人，從而少了溝通多了吵架，而兩個人相處所產生的問題亦不是一朝一夕的事，中間的離合數次都令我們成長不少，經過認真的考慮，我們決定先放手，各自專注於工作上。」佢話深信如果遲啲遇上大家，結果一定唔同：「如果時間能許可令我們遲一些遇上，我相信結果肯定不一樣，Kelly，感謝你給我這兩年喜與悲的回憶，亦多謝你的照顧、體諒和付出，希望無論在哪方面你都能幸福快樂，開開心心，感恩❤，多謝你⋯將來的事，就交給上天安排吧。」臨尾仲加上古巨基《愛得太遲》嘅歌詞：「盲目地發奮 忙忙忙從來未知，幸福會掠過再也沒法說鍾意」唔少網民留言慰問及鼓勵佢，希望佢早日重拾心情。
來源 source: http://hk.on.cc
|
鍾意就快D Share啦！
|
|
|
