藝人河國榮將於5月31日及6月1日在九展舉行首個個人音樂會，今日舉行記招時獲好友譚玉瑛擔任司儀，而唐文龍、J.Arie（雷深如）等則到場支持。台上河國榮表示1987年5月31日來港發展是因爲想唱廣東歌，但一直拍劇沒有機會唱歌，到今年是來港31年，故覺得是適當時間開騷。他表示會唱80年代的金曲，因為聽完這些歌才令他想來港做歌手。他亦坦言想邀周潤發（發哥）來睇騷：「因為10年前我同發哥去墨西哥拍戲，我做佢嘅英文導師，佢知我鍾意唱歌同做戲，就鼓勵我要繼續追夢，所以我想請佢嚟。」他又笑言想請已故巨星張國榮（哥哥）及陳百強來睇騷，問他唔驚嗎？他笑言：「可能佢哋一直都喺度呢。」嘉賓方面，他希望邀得偶像譚詠麟（阿倫）及張國榮來，笑言問緊阿倫，而哥哥如果發夢見到就問吓。
好友齊撐開騷
而身穿西裝褸隱約露纖腰的J.Arie表示拍戲認識河國榮，會主動來做嘉賓，又送了個外國壯男人形公仔給他，而唐文龍則謂與河國榮拍劇認識，又即場用啞鈴示範教他練腹肌。最後大會送上蛋糕，為本月30日生日的河國榮提早慶生。
揚言操弗被逼騷肌
事後河國榮與唐文龍一起受訪，問是否要操肌？河國榮笑言：「要呀，我會學佢咁勤力。（你有冇信心操到唐文龍咁大隻？）其實我3年前拍戲要做僱傭兵都練到好大隻，好似仲大隻過佢，但好辛苦。」問唐文龍可會做他私人教練？他笑言：「研究吓咁，其實唔難，只要飲食克制同做番某啲針對性運動，兩個月就有效果。」問到時操到大隻可會騷肌？河國榮謂其實之前拍戲都試過只穿內褲，唐文龍則笑言叫他騷肌：「如果佢操到必須騷啦，一定要！」問他可會來做嘉賓？他則謂到時再商量，河國榮則笑言驚他搶晒鏡。
想邀請阿倫、發哥
而講到河國榮謂想請阿倫來做嘉賓，他謂：「因為我1987年啱啱到香港周圍行，意外做咗佢演唱會嘉賓，佢哋之前喺studio認識我，有日我意外行經紅館，佢嘅樂隊喺後面休息緊，估唔到相隔一年仲認得我，所以阿倫叫我去做嘉賓，如果今次請到佢嚟都幾正，但佢好忙，所以都問吓佢先。」而問到邀請了發哥未？他謂：「未問，我都要搵朋友搵佢，其實都幾奇怪，我同啲明星做嘢係冇影相，所以我喺墨西哥都冇同發哥影過相，反而太太就有同發哥影。」
|
鍾意就快D Share啦！
|
|
|