掃呢頁CODE去手機

2018年4月29日 星期日

【黑變白】王晶翻拍《衛斯理》白老大變正氣警察 倪匡表示… __,倪匡,王晶,

【新增內容】今晚如果大家唔想出街,又想搵嘢笑下,而且不介意太浪費時間的話,可以捧場睇下王晶呢套新網劇《冒險王衛斯理》。分三個單元,第一個單元係林家棟擔 ...


【新增內容】

今晚如果大家唔想出街,又想搵嘢笑下,而且不介意太浪費時間的話,可以捧場睇下王晶呢套新網劇《冒險王衛斯理》。分三個單元,第一個單元係林家棟擔大旗嘅《支離人》,第二個單元係文詠珊嘅《藍血人》。愛奇藝已經播完《支離人》,王晶報喜話點擊有兩億!無綫今晚先至首播。

今次《冒險王衛斯理》,余文樂以「張志明」神情動態飾演衛斯理,國產「晶女郎」胡然飾演白素,仲要著性感睡衣晒34E,完全唔明點解要咁做。

更令人感難以接受嘅,係青幫頭目白老大(任達華飾)喺王晶安排下變成國際刑警頭目,白素呢?由「職業不明」變成都係國際刑警,哥哥白奇偉都係……做埋Interpol!估計王晶今次一來係為咗「戲劇性」,二來,係迎合大陸市場需要——黃賭毒黑唔拍得。

《衛斯理》作者倪匡對中共嘅「感情」,讀者應該聽過看過不少。他曾說:「人嘅天性會戰勝共產黨,因為共產黨係違反人性,違反人性嘅嘢,不能久存,從長遠同歷史嘅眼光,所有強權統治最終都會覆滅,無論佢當時幾咁強大,最終都係趨於死亡。」但今次白老大同白素變相「屈服」於中共政權下,齊齊「變形」……

《蘋果》致電倪匡,問到知唔知王晶將《支離人》改編拍大陸網劇?倪匡表示:「我知!」覺得余文樂適合扮演衛斯理嗎?倪匡話:「我未睇套電視劇,個個都可以做㗎!」

對於任達華扮演嘅白老大,原著小說角色係青幫頭目變為國際刑警元老級領導,竟將黑染白大兜亂,倪匡大笑:「哈哈哈,唔係介唔介意問題,係原著拍電視劇一定要改編。」失去咗原著精神喎?倪匡滿不在乎謂:「唔緊要,導演話事,導演鍾意咪得囉!」

由於大陸市場禁黑社會題材,唔知係咪基於呢個原因,白老大要由黑幫阿頭被改為刑警阿頭,甚至連白素都做埋刑警,倪匡話:「導演根據小說拍一部戲,邊有可能嘅事,當然一定要改編,唔係要編劇導演嚟做乜?我最反對『忠於原著』四個字,乜叫改編啫?攞任何小說改編都冇可能忠於原著。

倪匡續道:「文字同影視係兩回事,唔使講其他,《老貓》(衛斯理系列小說之一)貓同狗打交拍唔到,一定要改㗎嘛。」

對於王晶將《支離人》改到支離破碎,倪匡坦言:「冇意見。我寫小說,我又唔識電影點拍,唔好話衛斯理畀人改,金庸小說都畀人改。冇話要忠於原著,有規定要忠於原著咩。」讀者睇劇會好失望?倪匡笑說:「睇書唔失望咪得,電影失唔失望同我冇關係,戲好睇係王晶嘅事,戲唔好睇又唔係我倪匡嘅事,呢啲要分清楚。」

問到王晶拍攝前有知會嗎?倪匡表示:「佢當然有問過,冇問過點拍?我話唔識,佢鍾意點搞就點搞,我唔識拍電影嘛,我只係寫小說。」唔介意佢點改編?他稱:「唔到我介意!小說還小說,影視還影視,用小說嚟改編影視,係兩種創作形式,唔可以混為一談,主要睇佢拍得好唔好睇,唔使理佢同原著有冇關係,唔到我畀意見,人哋拍戲人哋事,唔係我嘅事。」有冇興趣睇呢部劇?口直心快嘅倪匡坦言:「我冇興趣睇,有興趣都唔得閒。」

至於白老大任達華「黑變白」,網民當然有意見,華哥回覆《蘋果》時,佢大賣關子:「峰迴路轉,白老大最後你就知佢身份啦,呢啲網民講得好好,等你哋睇到最後就知,原來係咁嘅,真實身份,網民一定會喜歡嘅。」唔通大玩《無間道》?

問到華哥鍾唔鍾意白老大呢個角色?佢話:「白老大係一個幾新角色,幾型仔,正邪兩邊都好吃得開嘅。」

張秀文今日回覆傳媒,講到喺《衛》嘅演出,佢自己都有睇套劇:「嗰個角色係有1場內衣戲,但劇情又唔算得上係性感戲份,有好多發揮空間,中間好多打戲同被打戲,好有挑戰性!」



《蘋果》致電倪匡,問到知唔知《支離人》改編拍大陸網劇?倪匡表示:「我知!」(資料圖片)

倪匡滿不在乎謂:「唔緊要,導演話事,導演鍾意咪得囉!」(資料圖片)

華哥回覆《蘋果》:「峰迴路轉,白老大最後你就知佢身份啦。」(資料圖片)

對於王晶將《支離人》改到支離破碎,倪匡坦言:「冇意見。」(資料圖片)

鍾意就快D Share啦!