喜歡秦沛（Paul哥）的觀眾大抵會發現，其實他很少接受專訪。
「唔係喎，我成日見到佢同姜麗文姜文杰一齊做訪問㗎喎……」係囉，你都答咗囉。
Paul哥疼愛一對子女，即使最初幾唔想兄妹承父業（還是家業？）入行，最終還是心軟首肯，用自己的名氣助一把力。其間或在某啲「細細哋」嘅首映或宣傳活動，赫然見到Paul哥身影，不問而知，姜麗文或姜文杰一定喺度。
今次這個專訪，主角是Paul哥。真係Paul哥，宣傳下月28起在香港演藝學院公演的舞台劇《奪命証人》。
訪問當日，Paul哥身體欠安，感冒菌作怪，借場拍攝時間亦有限，攝影師一個拍照一個拍片快靚正盡快完成任務，公關在旁安慰：「唔使急，唔趕時間！」本來氣定神閒擺好了pose的Paul哥即說：「咩唔趕呀？我趕呀！」趕回家休息，養好身體應付非常消耗體力的舞台劇演出。
其實入行70年的Paul哥，今年已經74歲了。
「做咗70年，演舞台劇唔係做咩紀錄，畀自己一個成就感，滿足自己，拍咗70年電影，如果有一日離開演藝界，好似差梗啲嘢。我做演員啦、做主持啦，喺演藝界咁耐，爭梗啲嘢喎，嗰樣叫舞台劇，所以呢個係我應承做嘅原因。」
「演舞台劇壓力好大，未做過吖嘛！拍電影電視，唔好可以嚟過，舞台劇冇得再嚟，要同現場觀眾交帶。所做嘅所講嘅，你都要好負責去做。好勁揪！話劇之父毛Sir、舞台劇王子謝君豪、大美人劉嘉玲，好幸運。」
細個睇Paul哥演《法內情》，在庭上咄咄逼人，今次在舞台劇改演大狀，箇中也有很大學問。「大家記得嘅話，我喺《法內情》做主控官，亦都曾經請教好多大律師朋友，都去過高院聽審，了解係咩一回事。」
「其實律師喺美國電影、或者歐美式嗰啲，英國唔包括，律師係可以行來行去，審犯又好，問證人又好，佢哋可以行來行去。香港以前行英式，律師只係企喺度講嘢。但拍《法內情》嗰陣，為咗好睇，學咗美式嘅行來行去，誰不知觀眾又受喎，哈哈！都幾賣座。」
「今次呢個劇，背景係七十年代，但毛Sir對我哋做演員更加好，因為演員企喺度講長篇大輪好辛苦，但行到邊講到邊，你行多幾次，每次你行到邊度講乜嘢對白，咁容易記好多。」原來以前睇《壹號皇庭》主控雙方企定定盤問，咁先至係正統喎！
早前fb專頁「威哥會館」貼出一張Paul哥在《癲佬正傳》的劇照，大家談得興致勃勃：「唔關我事㗎，拉班冚家x」、「佢冇事呀⋯⋯」但留言最多都係「有殺冇賠！」期間有高人留言謂：「聽講當年差啲上唔到畫，俾外間嚴重投訴，但內容相當寫實，馮淬帆最後俾梁朝偉斬死，有點意外；同埋佢向上司控訴精神病患者受到社會忽略、歧視，求支援一幕，反映現實一種無奈………」不變的是弱勢永遠受歧視，或全然無視；變的是今時今日，拍港產片，係會上新聞，或者擺上fb係呃到like嘅一回事……
Paul哥近年也明顯減產，對上一部是《春嬌救志明》的衰老竇。說起港產片不振，他說：「好難過囉！冇得講啦，市場嘅問題，早期嘅香港電影，除咗香港之外，有星馬泰、台灣、歐美，時代變咗，市場越來越少，競爭大咗，心裏面都幾難過！如果冇記錯，香港最盛況時候，一年300幾部電影，依家每年幾十部，差好遠，喺度掙扎緊。」
「其實仲有好多原因嘅，資訊問題，依家啲人上網睇啦，咪拍網劇、網上電影囉，唔好嘥時間喺電影院，但佢唔知電影院係另一種享受，以前一般人屋企冇冷氣，我寧願去電影院涼下冷氣，依家唔係，家家都有冷氣，我使等你睇咩？」
「你越發達（指資訊）我哋越辛苦。時代變咗，對電影只能夠（嘆氣），唉！冇乜辦法。」
搵番多年前Paul哥一個訪問，影圈良莠不齊，總不會部部也是佳作，故Paul哥當年也說得很坦白：接戲，一係睇錢，一係睇劇本。
咁依家呢？「我唔睇錢㗎喇，最近呢兩年根本睇唔到錢，睇錢嘔㗎！喺內地嗰啲，一部戲係好多好多萬喎大佬，唔好睇故事係咩、做乜角色、導演熟唔熟、老闆係邊個，錢都係嗰啲錢。差太遠喇。」
順帶一提一件小事，原來Paul哥都曾經收過一啲「奇怪」電話，搵佢開工，一開口，就嗌：「喂！秦沛！」
當堂打個突。Paul哥笑：「佢唔識（我）啫，啱啱入行啫，好多嘅，譬如有人打電話嚟，冇乜所謂嘅，一係叫『Paul哥』，陌生啲嗌『秦生』，佢一打嚟就：『喂！秦沛！我係乜乜副導演，聽日有場戲好有發揮，唔係好多，三場戲，一日拍晒㗎』佢唔知我係邊個，我話：『你問一問藝員科，睇我有冇時間拍啦。』」
最後有冇去到？「梗係冇我將呢個情形講出去，佢哋話：『你咪算好囉。』原來試過有人打畀周潤發：『喂！周潤發！』你一係叫發仔，一係叫發哥，『聽日有一場戲，好好㗎，你返嚟，09。』」
「第二日朝早9點發哥去到化妝間，啲人見問：『發哥，返嚟做乜？』『拍戲吖嘛！』『吓？邊齣戲？』『唔知呀，佢叫我入嚟等佢囉。』」好戲在後頭，打俾發哥那人跟住入嚟，一見到發哥：「咦，咁熟面口嘅？」
Paul哥解釋：「外國返嚟㗎嘛，你當笑話，冇話唔尊重，佢唔識你係邊個啫，發哥身上都發生過。」
採訪：余燕儀
攝影：林德雄
攝錄：廖達燊
場地：DADA Bar + Lounge @THE LUXE MANOR
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|