一代才女林燕妮離世，無綫重播林燕妮特備節目《懷念林燕妮 向世界出發》，而節目第二集重點講林燕妮的愛情世界。林燕妮年青時追求者無數，她在美國大學畢業後嫁給李小龍兄長李忠琛，並育有一子李凱豪，但結婚數年後，二人因性格不合離婚。之後林燕妮戀上已婚的黃霑，受盡千夫所指，當時林燕妮的父母亦反對女兒跟黃霑往來，林燕妮謂：「父母非常傷心，對方結咗婚，又有細路，又冇錢，所有唔理想嘅條件集於一身，咁我就因為同佢一齊搞公司，佢嘅幽默同辦事能力都幾高，再加上日日對住就產生咗感情。」
要求分手
林燕妮曾經向黃霑要求過中止拍拖交往，但遭對方拒絕：「我曾經要求過唔好再拍拖，但佢唔肯，我又比較浪漫，當時有啲說法話我係咪已經變咗小妖精？」當林燕妮同黃霑拍拖第八年，對方依然沒有跟妻子離婚，令林燕妮有所領悟：「我冇要求過佢離婚，而做妻子嘅，亦冇強烈要求離婚，咁佢點解要離？有老婆有仔，又有女朋友，He has the best of both world，兩個世界最好嘅都擁有晒，點解要離婚呢？就係咁拖吓拖吓，我覺得佢唔尊重我，我究竟係乜嘢人呢？！」
男方唔肯面對
與黃霑相戀十四載，最終因第三者介入而令戀情告終，林燕妮直言自己當時很不服氣：「我成世人冇畀人掟過，好唔甘心、好唔服氣，其實分手係遲早嘅事，我都心裏有數，但唔明點解唔肯面對自己女朋友，正式講分手，而係我返到屋企，見到乜嘢都搬走晒。」氣雖然難下，始終要尋求出路，1999年林燕妮到韓國華溪寺參加了為期六星期的短期襌修課程，跟崇山大襌師學佛。當時她只帶了兩件袍衣與一些襪子，每天過着刻苦的生活，她謂：「我一世人都未試過咁刻苦，每日食飯只有七分鐘，食飯、菜湯同埋一啲簡單素菜，食完要用滾水、一片蘿蔔清洗碗筷，之後再將水喝掉，要我哋學識珍惜食物。」
學識放下
在襌修期間，林燕妮每日朝早三點半便要起床，之後打坐至少八個半小時，然後幫手做寺院內的工作。當時天氣得零下十多度，她被安排去打掃寺院，除此之外，洗廁所、燙衫等寺務也要做，雖然日子過得苦，亦換來周身骨痛，但卻令林燕妮慢慢發現快樂的真諦，亦放下了與黃霑的一段情，她謂：「有人話愛嘅反面係恨，但唔係囉，我覺得愛嘅反面係不愛，我已經冇愛，只係有唔服氣，但當我係寺院度襌修到四星期左右，我突然想起嗰個人，我咇一聲笑出嚟，其實乜嘢都只係笑話一場，襌修唔係幫人解決問題，而係將人放喺肩膊上嘅包袱逐一丟掉，冇乜嘢係大不了，肩膊都輕咗。」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
