內地男星張丹峰與太太洪欣相遇相知13年，共同養育囡囡張晞彤，更愛屋及烏，對洪欣與莫少聰的仔仔張鎬濂一樣愛錫有加，好男人形象深入民心！上周二（24日）洪欣喺微博放上與一家人及親友去主題公園玩嘅大合照，有網友就聲稱聞到唔尋常嘅氣息，指經理人畢瀅站姿傾斜向張丹峰，又拉住囡囡小手，仲有大批網友表示佢哋三個更似一家三口…
被質疑與經理人過於親密
疑問聲忽然響遍網絡，有眼利網友發現畢瀅手上佩戴嘅手錶，同張丹峰隻手錶疑似情侶款。加上畢瀅經常跟喺張丹峰身邊，網友話呢單嘢隨時變成「王寶強婚變」事件嘅翻版，嗌洪欣要小心，擔心畢瀅成「女版宋喆（王寶強前經理人）」！更有網友翻查畢瀅微博，指佢曾曖昧向張丹峰大講「520（諧音我愛你）」，多張大合照企到貼一貼，又經常着同款「情侶裝」，直指女方對張丹峰過於親密，而張丹峰又曾為畢瀅慶祝生日等，網友紛紛偵探上身，繼而推測張丹峰疑背洪欣偷食經理人。
「出軌證據」逐點擊破
消息一出，當事人畢瀅即刻嬲爆，面對網友多「出軌證據」嘅質疑，佢怒寫長文反擊，更逐點擊破網友口中嘅「證據」。畢瀅指除工作關係，張丹峰同洪欣都當佢係妹妹：「峰哥欣姐拿我當妹妹一樣，一起跨年，給我慶生，對此我充滿感激，造成的誤會因為我們相處時間太長，關係真的好，我和峰哥之間只有知遇之恩沒有愛慕之情。」佢更加向網友道歉，指自己雖然好嬲，不過佢就話因為自己冇好好解釋，所以先會被誤會。
對於「情侶裝」嘅質疑，佢指大部分都係張丹峰及洪欣送畀佢嘅禮物，有啲更加係唔同牌子唔同款；至於情侶手錶，佢解釋指係錄節目時佢幫張丹峰拎住，而工作人員通常都會將幫藝人保管嘅飾物戴上身，因為咁樣最唔易整唔見或刮花。至於大合照被指企太貼，佢就話一般都會畀藝人企中間，旁邊嘅人好自然就會往中間靠，而佢都好錫張丹峰囡囡張晞彤，所以先會拖住手仔；「520」博文就係當日佢同張丹峰、洪欣食飯，張單啱啱好520蚊，而當時張丹峰微博Followers人數又係520萬，興起就放上網同大家分享。
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|