洪欣與大陸老公張丹峰結婚9年，兩人育有4歲女兒張晞彤，洪欣與莫少聰所生長子浩鋒亦跟繼父姓張，一家四口經常在網晒溫馨，幸福滿瀉！然而，噚日網上忽傳張丹峰疑背妻偷食，與經理人畢瀅似有曖昧（新聞連結：https://bit.ly/2v1NPJn），身為正印嘅洪欣接受《蘋果》電話訪問，力撐老公冇出軌。
由於事件越鬧越大，洪欣在電話澄清：「呢個經理人、呢件事冇人比我更加清楚，都唔知由邊度講起，一匹布咁長，簡單嚟講，呢個經理人好似我屋企人一份子，佢唔單止照顧我老公嘅工作，仲照顧埋屋企所有人，包括我老公嘅屋企人、我哋屋企人、我哋所有事情，佢都幾攰幾辛苦㗎，佢嘅工作身份好多，除咗幫我老公接工作傾合約，佢仲要起居飲食全部照顧埋，甚至乎屋企所有大小事務。」身旁囡囡搭嘴：「同埋我！」
洪欣笑說：「阿女喺隔籬講，我哋有時忙，都要佢幫手睇住，唉！所以真係唔知由邊度開始講起，佢嘅身份總言之要照顧埋我哋所有人嘅嘢，我老公變咗好依賴佢，因為呢個經理人其實幾細心，我老公見到佢咁細心，所以好多嘢都交畀佢處理，我哋覺得佢喺各方面都係好可靠嘅人，譬如錢銀上，我哋都覺得佢好可靠。」
雖然身為人妻兼人母，但洪欣自爆生活上好多細節，老公都依賴經理人：「你知啦，我哋生活上好多瑣碎事都要佢買，有時食嘢自己唔帶錢出街，佢負責埋單，所以老公依賴到我哋出街都帶埋佢，我哋連卡都唔使簽，可以空手出去。有次好好笑，我老公約咗朋友，唔記得帶經理人去，竟然埋單先諗起身上連卡連錢都冇，即係已經係去到生活上咁樣依賴佢，所以佢成日都會跟住我哋。」
洪欣話甚至喺淘寶買嘢，都係經理人先幫忙畀錢：「你知咁多生活上瑣碎事，同埋錢銀上一定要搵個可以信任嘅人，佢就係值得我哋信任嘅人，成日同我哋形影不離，好埋身，去到邊都帶埋佢，因為佢就好似我哋屋企嘅管家，唔單止要照顧老公，佢都照顧我個仔，大小事都要佢負責，變咗咁親密大家有所誤會。」
精選娛聞，喺晒《娛果》
http://fb.com/appledailyent
| 洪欣開腔力撐老公（網上圖片） | | |
|
鍾意就快D Share啦！
|
|
|