「你個頭搞乜？」、「你覺唔覺得Oscar呢個名比較普通」、「啲帽點解要掟？」
大概，參加ViuTV真人騷《Good Night Show全民造星》嘅參賽者，點都唔會諗到表演完會得到以上嘅評語。
冇錯，呢個被譽為係由全香港娛樂界合力「打造」（非港語）偶像巨星比賽嘅節目，最新嘅星級評判團，就係合作伙伴之一「中國3D數碼娛樂」嘅五位代表，而當中俾網民鬧得最多嘅，就係蕭定一、張建聲同吳漢邦。
點解俾人鬧？咪就係因為佢哋畀咗上面嗰堆評語，搞到無論節目監製花姐、導師，以及觀眾，都覺得佢哋嘅評語廢到一個點！
事緣呢個星期播出《全民造星》第28、29集入面，當一眾參賽者表演完後，身為評判嘅張建聲，竟然問：「你個頭（髮型）搞乜？」廢？未算，皆因蕭定一嘅評語就完全廢到你諗一世都未必諗到：「你覺唔覺得Oscar呢個名比較普通啲？會唔會好容易同人撞名？」、「喺我腦裡面，印象最深嘅就係Stanley嘅胸肌，所以我就揀A組。」
至於身為導演兼監製嘅吳漢邦，就非常執著咁問參賽者點解要掟嘢：「啲帽點解要掟？」、「做乜要掟啲眼鏡？我見唔到有乜原因要咁做……」呢啲咁嘅評語，令到身為導師嘅卓韻芝忍唔住話佢哋hea、Eric Kwok話佢哋淨係識抨擊人個名、髮型，就連《全民造星》嘅黑面監製花姐，都忍唔住鬧爆：「可唔可以講啲有意義嘅嘢？你由開場到o依家，都冇講過有意義嘅嘢呀！火都嚟埋呀真係！」
花姐又指作為一個參賽者，就算輸咗，都會期望得到嘅評語係關於表演：「作為評判，我覺得對表演者都應該有個尊重，因為我覺得，作為參賽者，就算我比賽表現好唔好，我都希望得到一個comment，係話畀人聽，我呢個表演有乜嘢好、有乜嘢唔好：就算我輸贏唔重要，最少我知道自己好唔好，否則我冇必要咁辛苦去練一個item。但原來我得到嘅係你問我『個名點解叫Oscar？』咁普通，我諗就算贏嗰方聽到個comment都會唔舒服。」
而導師之一劉美君，更因為呢班星級評判將表演當成戲劇咁去評審，忍唔住喺後台爆咗句：「頂你個肺！」再衝出舞台同佢哋對質：「我聽到你哋咁評我就覺得好唔fair！佢哋係諗緊一個表演...我都好奇怪唔知點解我啲仔變咗戲劇，我覺得好唔fair，我唔想有唔公平嘅出現！」
而一眾網民，對於呢班星級評判嘅表現一面倒彈到爆：「全民要求換晒班垃圾評判，自己都係二打六嘅時候，邊有資格去評人，係無綫仲係五、六線藝人，嚟到變咗周潤發，笑大人個口」、「垃圾評審。真係睇到火都嚟依班所謂評審。」、「Viutv請得呢班人做評判就預咗架啦下話，連趙永洪同吳漢邦呢啲咁嘅質素都請得上嚟做評判喎，Viutv唔係真係expect佢哋上到嚟真係會俾到啲咩資格評語呀，咪玩啦。」
而對於劉美君呢個衝出台對質嘅舉動，大家都好支持：「支持劉美君，要公平，現在啲評判，好垃圾。」、「劉美君嗰下『頂你個肺』頂得好好聽。」、「其實劉美君真係好勇敢，我諗佢係因為睇足咁耐啲評判講嘢不知所謂，所以先忍唔住出去小嗰班人。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
