58歲嘅吳麗珠，性格硬淨、堅忍，佢話成長遭遇，造就今日嘅佢。
兒時父母離異，六歲跟父親生活嘅吳麗珠，小時候缺乏照顧，被迫當街偷嘢食充飢。
「爹哋媽咪離婚，跟住我哋七兄弟姊妹，有五個跟爹哋，一個跟媽咪，一個跟舅公，我仲記得六歲時，因為住北角，返柏道嘅聖士提反，就無人理，因為我哋潮州人，我係第四個女，都唔值租，自己返學嘅，坐個幾鐘頭巴士，我成日覺得冇咩唔得㗎，適者生存。
同埋細個時爹哋都係爛賭嘅，有段時期成日偷嘢食㗎，周街偷嘢食，試過被人追，追九條街，啲人嗌：『細路咪走呀！』我腳都軟嘛，將啲嘢食丟晒我六歲之後跟爹哋住，直至跟到十二歲，就全部兄弟姊妹跟返晒媽咪，同媽咪到九龍居住啦。」
父親嗜賭又風流，兒時吳麗珠，還要適應同幾個繼母相處。「細個梗係唔識諗啦，睇粵語殘片後母梗係最唔好啦，但佢又唔係好嚴厲，之不過細個覺得佢好惡。而家大個諗番，當時爹哋去咗越南做嘢，一個女人冇愛人喺身邊，又要照顧一啲唔係自己嘅小朋友，掉番轉我而家識諗就覺得佢幾偉大啦，亦都幾傻，變咗而家我都會照顧佢嘅，我爹哋臨走就話想見其中一個，就是第一個繼母，佢就答應咗每個月俾一個銀碼照顧佢，佢做唔到個承諾嘛，咁我就去做囉！」
與其中一兩繼母，吳麗珠至今仍跟她們聯絡。「有一兩個係我哋朋友囉，一個喺菲律賓生活，九七年我都試過去探，因為我覺得冇乜錯與對嘅，愛情嘅嘢，而家我大個咗就明白到，我對婚姻制度都懷疑緊，有好多問號，所以到呢一刻我都冇結婚。
都係嗰句，爹哋轉太多作為女兒，你轉咁多次，會有咩感受呢？我寧願係女朋友就算囉！後期佢到中山住，佢帶啲女朋友出嚟，二、三十歲，我都照樣一齊食飯，我哋都很開放，我接受到，但就唔好再搞結婚離婚結婚離婚，跟住又話同最後嘅後母離婚。
嗰個應該係第六次，呢次我就好嬲，我同爹哋講，唔好再玩呢個遊戲，我打長途電話鬧到佢上天花板，跟住冇睬佢幾年。直到爹哋走之前，佢身體唔好，錢又使晒，輸晒於是搞番佢落嚟香港，我都照顧佢，讓佢住喺老人院，但我就唔係成日去探佢。到佢喺醫院日子，日日都同傾計。佢走咗，有段時間我會嬲自己，既然你都原諒佢，負擔佢住老人院，點解你唔陪佢多啲，諸如此類。又或者佢病嘅時候你多啲見佢呀，不過冇得返轉頭，所以有時遇到一啲小朋友，我都會同佢講，你啲關係會複雜得過我，所以盡量去包容原諒。」吳麗珠說。
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
點擊圖片
【坎坷童年】爛賭老竇有七個老婆 吳麗珠周街偷嘢食過活
來源 source: http://nextplus.nextmedia.com
|
鍾意就快D Share啦！
|
|
|