見到吳麗珠，你就諗起佢扮仙姐同葉劉最耍家。94年長壽節目EYT停播前，佢已開始鋪路轉型做地產，更由經紀一度做到開地產公司，自己做老闆。
近年佢復出幕前，客串拍Viu TV劇《VR驅魔人》，亦重操故業，再當地產經紀。佢嘅身家試過如過山車經歷。昔日喺無綫，出名勤力兼鐵人嘅佢，身兼五職。拍劇、登台、攪製作公司同時，亦可放下藝人身段，走去做白領，任地產經紀，做金融，為缺乏安全感嘅娛樂事業舖定後路。
「只不過我想除咗娛樂事業之外，想學多啲其他嘢。記得初初返工早八、九點逼返中環，第一日覺得好辛苦，第二日就已經適應。返工嘅時候逼地鐵已經唔慣，跟住好似好蠢咁，完全唔識用傳真機，電話多粒掣都唔識用，但都好，我都叫做出路遇貴人，老闆娘同秘書都好肯教我，咪慢慢學。」吳麗珠說。
「第一單成交我應該做咗一千八百幾萬，中半山一啲豪宅，當時來講一千八百幾萬已經叫豪宅，佣金差唔多有八，九萬，我淨係自己袋，我覺得真係可以慢慢轉行。」
見成功轉型，心雄嘅佢踩多瓣。「又有朋友叫我試下做股票，我又貪心，又走去學下做股票。不過初做金融好困難，因為第一真係唔識，初期做嘅時候俾啲客用粗口鬧都試過，因為佢講一啲術語，我唔識，嗰個術語叫做「隊」，「隊」即係叫你沽貨，你慢咗人客會有損失，客唔會錯架，我覺得俾客鬧係啱，有時學一樣嘢俾人鬧會更加深刻。
嗰時我未有牌，要間接經一個有牌嘅同事先做到個成交，於是我同自己講，要好似《歡樂今宵》咁，要一take OK，一定要考到個牌。但係咁忙我點讀？我就朝朝五點幾起身，洗濕自己個頭，唔可以瞓覺，尤其是冬天，我仲記得嗰本書好厚，全英文，雖然我都係聖士提反女子中學出身，但因為做幕前，唔使點講英文，無接觸差唔多成十幾廿年，變咗又要重頭學過，查字典，以前查一次就可能記得，可能年紀大咗，記性無咁好，要查三次先記得個字，但係都叫做好彩，俾我一次過考到，一take OK，考到個牌。」
昔日登台又身兼多職，佢將辛苦賺嚟嘅血汗錢，曾經全傾注喺炒樓事上，風光時佢手持六個單位，結果97年一炒嗰啲就輸曬，將我投資嘅錢輸番晒場金融風暴，化為烏有。吳麗珠：「後期就學人炒樓，炒樓就衰咗，投資嘅錢係輸曬，但慶幸無蝕到入肉，起碼我自住嗰間仲喺度，從此我投資理財都變咗會保守啲。」
身家瞬間蒸發，佢睇得好開。「當係上咗一課，做人都係要穩穩定定，唔好去炒炒賣賣，當然有啲人係叻嘅，有啲人好叻投資，嗰啲叫另類，又或者人地運氣比你好，你莫羨人囉。當然唔見咗嚿錢，當輸咗場牌，都會有少少唔開心，但係好快就無嘢，重頭再嚟。」
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
點擊圖片
不屈不撓吳麗珠 炒樓輸晒血汗錢:做人穩穩定定好
來源 source: http://nextplus.nextmedia.com
|
鍾意就快D Share啦！
|
|
|