好多港女都有個「王妃夢」，好似凱瑟琳同梅根咁，邂逅英國王子再搞個世紀婚禮升呢做王妃，唔使入院換血都變Blue Blood，最緊要唔使返工！最近就出現咗一位港版準王妃，唔係講緊霆鋒位天后女友王菲喎，而係啱啱宣布有拖拍嘅鄧麗欣（屎塔肥），皆因佢嘅男友仔就係嚟自台灣、個朵叫「王子」嘅邱勝翊，成個王妃光環由頭笠到落腳，難怪近期佢唔使靠反光板，成個人都閃閃發光，靚到沉魚落雁、閉月羞花，就快靚過零死角嘅迪麗熱巴！
劈斷情絲飛「雀仔」
其實屎塔肥係現實版灰姑娘嚟㗎，細個家住屯門大興邨，又喺單親家庭長大，生活未去到赤貧，但都唔係富裕，不過佢就天生一條王妃命，灰姑娘有仙女幫佢變成千金小姐參加王子舞會，屎塔肥就有唱片公司高層陳志光簽嚟做Cookies做星，畀機會佢遇上「飛魚王子」方力申，諗住疊埋心水等做「飛魚王妃」，點知呢條表面係「飛魚」，實質係「無腳雀仔」扮，等足10年都唔定性，屎塔肥打空手道打到封后，真係手起掌落，劈斷情絲冇難度！
女人有幾多個10年？王妃夢碎唔揼心就虛偽，睇佢喺機場喊得一句句就知好在喺芳心最寂寞嘅時候，仲有隻台灣「牛女」鄧衍敏騎住先，有呢位排球隊教練陪打友誼波過日辰，好過日日喊到暈！屎塔肥的確好鍾意打排球，只不過日打夜打，食得波餅多都會厭、會飽，況且佢係人，仲係女神，絕對唔係通勝入面嗰個一時有着鞋，一時冇着鞋嘅芒神！叫佢拖住牛牛日曬雨淋過人世？ 咪盞對牛彈琴好冇癮！ 況且屎媽又唔Like 個女SheShe，計落呢段「人獸戀」注定沒有好結果。
「王者之劍」刺穿心
屎塔肥冇咗條魚又戒埋牛肉，咪睇死佢要長食齋呀！ 34歲嘅佢不失為一個獨一無二，唔屎冇塌嘅屎塔肥，15年一次嘅天文奇景「火星大衝」再加埋月全食都出現啦，佢有仔埋身有幾咁奇？唔怕老土又係嗰句，一定一定又係緣分嘅安排，更加相信佢同王子食嗰餐敍舊飯揀咗二人火鍋套餐，否則又點會相識成十年，坐埋一齊開鑊飯就一撻即着？
真心不得不讚吓嗰位王子，佢真係有王者風範，寶劍出鞘果然誓不虛發，唔使出動古堡、南瓜車、玻璃鞋呢啲物質嘢就一矢中的，屎塔肥就畀佢把「神之劍」緊緊拮中咗唔知邊個位置，愛到難捨難離，王子喺香港開個演唱會啫，未認愛嘅屎塔肥慌死撐唔切仆住去睇騷，為咗面聖多一陣，仲特登飛台灣陪佢去蘇梅旅行唔嫌撲頻，連男友仔個細佬毛弟都關照埋；到王子嚟香港探佢，佢又慌死王子係路癡，出動埋私家車接送，照顧周到似阿媽多過似女友，同大自己5年嘅女友拍拖真係好處多，王子都冧到忍唔住爆響口晒命大讚：「好貼心！」依家佢哋公開認「十分愛」咪好囉，見到個路牌寫住「Prince St」都思潮澎湃，愛如潮水咁話：「彼此走上了同一條道路上」，知啦知啦，知你哋有路啦，就此祝屎塔肥行完「太子道」快啲再邁向「皇后大道中」
|
鍾意就快D Share啦！
|
|
|