剛踏入40歲的林嘉欣，相隔多時今年連拍兩片，既要面對拍片壓力，同時又要做回媽咪角色，想付出更多社會責任，完全是藝術型多功能媽咪的大考驗。說話雲淡風輕，林嘉欣最愛70年代free style風尚，但卻有一套育兒堅持，永不將負能量帶過夜，「我反而希望啲女知道，我都有軟弱的一面，我可以認輸，因為我都可以有錯。」
撰文：林妙萍
攝影：郭賢興
化妝：Will Wong
髮型：Bart Choi
服裝提供：Louis Vuitton
林嘉欣自從2010年結婚生女後，一度淡出演藝圈。回歸後，能量大爆發，她在2015年成為金馬獎大滿貫影后，今年又連拍兩套新片，包括夥拍劉青雲的《廉政風雲煙幕》，以及與劉德華合作的《掃毒2天地對決》。
月前林嘉欣首次在婚後放下女兒及老公，在澳洲留足一個月拍戲，事前工夫做到足，「係我變咗『癡媽』，結婚以來第一次離開咁耐。我飛之前寫定30日嘅信，因為我知啲女每日行程，例如上課外活動，所以就會問佢『今日好唔好玩呀？』之後就請爸爸、auntie每日放喺信箱，等佢哋好似有啲嘢期待咁。」
| | |
負能量即晚清
林嘉欣今個月40歲，大女Kayla和細女Sofie也分別7歲及5歲，談到女兒很快就會進入反叛期，她說：「我容許佢反叛，因為屋企大家都有權利發言。我唔會話因為我係媽咪，所以你要聽我講，唔會，我反而希望啲女知，我都有軟弱嘅一面。」試過一次，女兒開大音樂聽Beyonce、Katy Perry，令她大吃一驚，「因為歌詞入面有啲message，好似你畀你電話號碼我，我打畀你，邀請你嚟我屋企之類，我就覺得乜嚟㗎？我要慢慢去調校自己，唔好即刻嬲咗，要寬容啲。」
問到有甚麼說話是絕不能和子女講，林嘉欣說：「第一，唔可以講『我都話㗎』呢句係死刑嚟！等於翻舊賬、double message；第二係，你幾嬲都好，唔好用啲『唔要你！唔愛你！送咗你畀人！』」母女之間一定有吵架，但她堅持有不快當晚要解決，「會臨瞓前去攬吓佢，畀佢知道無論大家有幾唔同，點都好，媽媽係愛你。」
着衫要舒服
林嘉欣穿上Louis Vuitton秋冬新裝受訪，今年和LV有多個時尚及慈善合作，她坦言愛穿裙，尤其長裙配軍事風的短褸，「我覺得着衫一定要舒服，着得唔舒服就會周身唔自在。」她最愛Jane Birkin的70年代自由精神，「嗰種好carefree嘅日子，大家好自由，好樂意去試唔同嘅嘢，嗰時Jane Birkin好鍾意着好闊嘅高腰褲，再揳件tee入去，佢哋好自在呀！唔會因為一陣子嘅風吹草動而動搖自己，好有自己態度，亦好堅持自己嘅睇法，好好！」
充滿閃光燈的紅地毯令林嘉欣最緊張，「女明星最怕就係好高嘅高踭鞋，6吋高嘅高踭鞋，由你落車，行到去嗰條梯級，嗰條路係死亡㗎！你要諗，我跌嘅話要點跌？」
更多精采時尚內容，盡在 http://add.appledaily.com 。
|
鍾意就快D Share啦！
|
|
|