農曆七月十四傳統鬼節快到（本周五），唔通真係相傳鬼門關大開咁得人驚？話說Candy小姐喺上周五（17日）晚深夜坐住朋友部車上大帽山，點知途中突然有個紅衫女喺車頭前面撲出嚟，佢同朋友當堂嚇到神不守舍，直覺話畀佢哋知係撞鬼，Candy仲心諗：「唔係咁猛呀？」就係呢個時候，個紅衫女將個白色手袋掟向部車，Candy睇清楚先知道原來係人，真係嚇鬼死。
Candy話事發嗰時係接近午夜12點，佢因為約咗大班朋友上大帽山玩，所以當時就坐朋友車上山，點都諗唔到會有個紅衫女，半夜三更喺山頭出現，當時唔以為撞鬼就奇嘞。從Candy提供的車Cam片所見，當時對面線仲有對頭車嚟緊，個紅衫女突然喺對面線撲出嚟，撲向Candy部車嘅右邊車頭。
由於事出突然，Candy話佢同朋友都完全無為意，嚇到打個突，Candy仲心諗：「唔係咁猛呀？仲着紅色衫添？」好彩當時車速唔快，所以先煞得切車，但Candy朋友見到咁，都即時入後波倒後部車成個車位，避之則吉。個紅衫女唔知係咪自己差啲畀架車撞到，仲將個白色手袋掟向部車添。
到呢一刻，Candy話先睇清楚個紅衫女原來係人。對方仲係着露臍裝㗎，相當性感，身後仲有個男人跟住追上嚟。鬼咩，周圍咁黑邊睇到對方係一男一女啫。Candy話相信個紅衫女可能係飲醉酒喎，佢同朋友定一定神之後，先至開車繼續駛上山。所以話夜媽媽着乜鬼紅衫呢，Candy仲話呢個農曆七月，自己都係少出夜街為妙。
你敢爆，我敢獎！ 即Call《蘋果》24小時爆相爆片熱線：63836568
|
鍾意就快D Share啦！
|
|
|
