無綫嘅新聞取向，一直有唔少爭議。不過，新聞部盛產靚女確係事實，只係近年「睇得」又有料嘅男女主播走完一個又一個，唔少女神級主播仲加入咗人妻行列，令網民大叫心碎了。
現年28歲、前年被海通國際睇中嘅前主播黃麗幗（Ruby），早於15年已經成為人妻，當日有網民得悉Ruby要嫁人，仲傷心得喺討論區留言話「連黃麗幗都結埋婚，人生仲有咩意義？」但係世事無絕對，《蘋果》收到消息，Ruby原來已經離婚，更有傳回復單身嘅佢，身邊已經有唔少狂蜂浪蝶。
據知，15年年底結婚嘅Ruby，去年年中已經離婚，至於離婚嘅原因，就係最老土嘅「性格不合」同埋「因了解而分開」！有認識Ruby嘅知情人同《蘋果》講：「其實Ruby結咗婚之後，好多時都覺得佢唔開心，大家都好少見佢老公同佢一齊出嚟，有時覺得佢好孤伶伶。」
不過，知情者話Ruby同前夫係和平分開，又話：「分開原因主要係生活上嘅嘢好多唔夾，住埋一齊相處唔到咁啦，或者因為佢哋拍拖十年都冇試過同居，不過無論如何，身邊朋友都會支持佢決定。」
回復單身嘅Ruby，工作依舊忙碌，不時都會喺社交網分享工作上嘅嘢，但偶爾都會update一下自己近況，上星期佢就喺Ig貼咗張企喺沙灘上嘅相，仲留言話：「人生與幸福從來都不需要向別人交待。」似乎有所暗示。
《蘋果》聯絡過Ruby，對於離婚傳聞，Ruby透過短訊回覆時直認不諱，但就話唔想講太多。問佢係咪傳聞中，因為同前夫相處嘅問題導致分開？佢就話：「Sorry，真係唔想講太多，都唔想影響到佢（前夫），我哋仲係朋友，仲有聯絡。」
之後Ruby再補充：「其實我哋分開咗都無主動講畀人聽，始終唔係開心事，只係大家朋友知，而且都要向前望，要過生活，大家都想快啲過正常生活！」問Ruby身邊係咪已經有追求者？佢就話：「都有朋友話介紹男仔俾我識，順其自然啦，因為我依家再讀書，希望快啲考CFA（特許金融分析師），攞埋分析師牌。」
|
鍾意就快D Share啦！
|
|
|
