七年冇做過舞台劇嘅劉玉翠，今次出山，因為可以同演藝學院同學兼雀友嘅關寶慧，莫家堯，同埋身為今次監製嘅劉雅麗一齊合作。原來佢同關寶慧呢對老友相識三十多年，竟然台前合作一次都未試過，所以難得有機會，佢倆都話好似回到讀演藝時咁開心。 除此之外，呢個改編自英國劇作嘅《她媽的葬禮》，劉玉翠好欣賞帶出嘅訊息。「我成日覺得呢個劇本好值得參與，因為佢唔單只係一套戲，演員或者觀眾其實都會喺劇本中學習到一啲嘢，你會感染到其他人，呢個最重要。」 關寶慧亦有感而發。「呢套戲講述媽媽離世，叫《他媽的葬禮》，我開始每日都諗，真係要多啲陪媽媽，因為真係唔知佢幾時走。」 一個葬禮，往往都係俾在世嘅人一個反省嘅機會、特別係檢討同親人之間關係，甚至處理潛藏多年嘅心結。 關寶慧續說:「我好鍾意劇本講嘅，叫人試吓原諒別人，如果好多嘢可以原諒、可以包容嘅話，你會明白咩嘢叫珍惜，再珍惜多啲身邊所有嘢，包括父母、兄弟姊妹 個人會開心好多，唔好等失去咗先至後悔。」 綵排過程，更勾起劉玉翠失去至親嘅情緒。「我最初真係有喊，不過可能而家已經喊乾咗，不過呢個係一套黑色喜劇，所以唔會太傷感，觀眾睇嘅時候係會笑嘅，但希望當中都會觸動到大家。」
百無禁忌嘅關寶慧，仲話多年前已諗定將來嘅葬禮要點樣進行，其中一樣必定要在葬禮上出現。「剛才我笑，係因為諗起廿年前，因為我好鍾意食豆豉鯪魚、午餐肉同埋茄汁豆，我希望後人會喺靈堂擺茄汁豆、豆豉鯪魚同埋午餐肉。」
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|