2014年雨傘運動後，黃秋生一直被王晶狙擊，演藝事業更被封殺，呈現「被退休」狀態，經濟出現危機。不過，秋生無恨，反而喺ViuTV節目《大星講》中表示衷心感激：「王晶，衷心感激佢，衷心感激佢令我人生有一個好大同好深層嘅認知。係好事嚟架，真係架。呢啲喺佛教入面叫做善知識，即係踩你兩腳嗰啲呢，你真係多謝佢呀。」簡單嚟講即係以德報怨囉。
講係咁講啫，但事實就係「黃秋生」三字直到而家依然喺「封殺名單」之上，依然影響生計！學主持人陶傑話齋你睇得開啫，但影響深遠喎：「咁樣好慘架喎，呢啲作孽嚟喎。因為跟住有5000條嗰啲五毛、無知嘅人，一路打落水狗、一沉百踩，就成案架喇，成案就白紙黑字紀錄架喇。咁就無端端（封殺）三年、五年起不等。」
秋生都話的確有好多好心人想幫佢，亦好多人同佢講無「名單」、無「封殺」呢回事，不過奈何事實誠如陶傑所講 「你話有無名單呢？我唔知。但係我知嘅係咩呢？連鬼佬有部話想喺香港拍嘅戲，都同我講話香港有製作人話唔用得我。唔係一個喎，跟住另外有部法國嘅又係咁講，咁嗰啲人（外國人）唔識架嘛。一年之內，今年之內，有5個同我講呢啲咁嘅嘢，咁你話有定無吖？你話如果舉手去問，或者識人，我識邊個邊個問完返嚟都係話無嘅（無封殺名單），但事實就係有，我係信事實嘅啫。總之而家所有人嚟搵親我呢，我都第一句 譬如英國嗰啲都係架，一搵我，我第一樣就係話：『唔好諗內地呀，費事累你。』」
記得2015年，秋生被王晶追住吠時，秋生已經求饒：「我求你唔好再搞我，我就係咁衰，你唔好理我啦，我係爛泥扶不上壁㗎喇。唔好再搞我，多謝唔該。惟有係咁啦，仲可以點？」估唔到三年後，秋生講過嘅譬喻中嘅有錢佬，依然追住個乞丐踢佢個兜。
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|