「其實我同女朋友都係選擇一啲好開心嘅嘢畀大家睇。」今年9月，洪卓立說。
言猶在耳。
今年5月，30歲嘅湯怡出席一個活動時，談到與洪卓立拍拖十周年，問佢有冇心急結婚？佢話：「依家先係黃金時間，唔到35歲都唔會諗結婚，愛情唔係第一位，事業家庭行先。」仲話兩人已有共識。男方呢？就話：「不嬲都冇諗結婚，冇諗係唔係今年，有諗過旅行結婚，結完番嚟先擺酒。」
但呢個wedding plan，似乎短期內都無法實現。
拍拖11年，立立同湯怡噚晚宣佈分手，做番朋友。男方表明「發貼後不作回覆，望見諒」，但兩人ig煞是熱鬧，紛紛留言太息，大多可分兩類，一類係感歎拍拖11年、唔「婚」就「分」；另一種講法係將個波射去爺爺——拍《逆緣》嘅陳家樂。近來其公司英皇頻將爺爺與湯怡以情侶檔示人搵真銀，難免被外間當成係一對。
另一種講法就係話兩人事業發展漸有距離，加上拍咗拖11年，再無新衝擊，分手亦不足為奇。
立立一出道就囊括當年所有樂壇新人獎，點知啲獎去年俾媽媽同同居女友（即湯怡）掉晒。習慣向大家報喜不報憂嘅立立，笑笑口向傳媒謂：「好彩阿媽掉之前有影低相。」女友即去垃圾房搵，結果喊住返嚟話冇，立立仲反過來安慰女友。
事後有傳媒問番湯怡，佢就解釋謂屋企有幾大盒嘢擺咗幾年，以為冇用，所以冇拆開就掉。當時記者笑佢：「咦，你都擺咗幾年喎。」湯怡就笑：「冇所謂，咪掉囉，睇吓邊個掉邊個。」
兩人既已同居，咁分手又點算好？湯怡應一早做晒planning。今年7月，30歲嘅湯怡以約800萬購入將軍澳調景嶺一個兩房兩廳「上車盤」。據知湯怡騷價唔高，都係三萬幾蚊左右，竟然有能力上到車，佢話係全靠第一日就開始努力儲錢，再加一個「慳」字，但亦坦言：「買到樓連屋企人聽到都難以置信。」過到銀行壓力測試，按揭年期超過25年。
湯怡上車後，加上避談感情事，引來分手疑雲，立立當時好勞氣咁話：「我畀佢（湯怡）激死，其實我哋感情生活好好，只係大家有共識、少提感情事。不過見到報道都嬲，佢竟然連我鍾意啲乜嘢都話唔知道，其實係佢唔識點樣推同避答。我哋一齊十年，又點會唔清楚對方喜好？」
最後，立立笑言：「總之湯怡係屬於大家，袁家怡（湯怡原名）就屬於我！」
言猶在耳……
|
鍾意就快D Share啦！
|
|
|
