2009年因為《超級巨聲》入行嘅劉威煌，誇張啲講，近年好似消失咗咁。直到早前，慕名去銅鑼灣一嘗港女們甘願排兩個鐘隊去買嘅黑糖飲品，先至驚見劉威煌喺舖頭入面。
打工？原來，間飲品店係劉威煌親自喺台灣傾成代理返香港開舖，然後自己落手落腳打骰。咪睇佢間舖打晒蛇餅，收錢收到無停手呀，其實當初由幕前歌手轉為賣台式飲品時，劉威煌坦言有心理關口需要衝破，甚至有人會惡言相向令佢難受架！
「有啲人會指指點點。」劉威煌說：「即係有啲人會話：『咪好囉依家做珍珠奶茶，腳踏實地喇！』或者一啲可能見到你面善，跟住會好錯愕，甚至有啲客會驚，驚到以為我拍緊節目，跟住唔買嘢飲走咗去，我都試過。所以每一次發生呢啲嘢嘅時候呢，嗰一下就係壓力囉，可能因為咁要去廁所抖一抖，又或者調返去後面唔好見咁多人，呢啲我都試過。」
點解做做下歌手要轉行？原來佢19歲開始已不時做下生意仔，加上TVB能夠提供俾歌手嘅平台唔多，令佢都坦言「剩係做歌手搵唔到食」，於是2016年開始喺葵涌廣場經營第一間台式飲品店，直至而家以新品牌進駐銅鑼灣。
劉威煌相信力不到不為財，難怪《壹》仔現場所見，佢雖然作為老闆，但由落單、收銀、沖調以至包裝，每個步驟同工序，佢都有參與。「我負責嘅部分唔只落舖面，我哋仲有後面廚房部分，由煮出嚟到點樣落一張單，到點樣沖一杯嘢飲俾客，每個過程基本上我都要學晒。」
當初因為搵唔到錢，由歌手轉做賣奶茶。而家因為賣奶茶有穩定收入，劉威煌話歌手路有望重新出發：「我上年諗住唔出歌，但今年又有計畫再繼續喺唱歌上面落多啲功夫，因為有穩定收入或回報，令我可以喺娛樂圈上面放膽去衝呢，都唔會跌得咁傷。」
來源 source: http://nextplus.nextmedia.com
|
鍾意就快D Share啦！
|
|
|
