【爆相爆片】後生仔偷$69手機殼被截 塘邊鶴：都唔係打交嘅 __,爆相爆片,

大家都知道店舖盜竊係嚴重罪行，但偏偏有人以身試法。上周五（7日）有個21歲嘅後生仔就為咗區區一個價值69蚊嘅手機殼，喺深水埗福華街一個電子特賣場偷嘢。 ...

大家都知道店舖盜竊係嚴重罪行，但偏偏有人以身試法。上周五（7日）有個21歲嘅後生仔就為咗區區一個價值69蚊嘅手機殼，喺深水埗福華街一個電子特賣場偷嘢。結果佢俾店舖職員發現，兩個職員仲追到去附近地鐵站口將佢截住，最後警員到場人贓並獲，將疑犯拉上警車帶署調查，個後生仔就咁衰咗啦。

被人偷嘢嘅電子特賣場位於福華街161號福仁電腦商場，當日下晝5點幾，目擊市民Andy經過，佢話當時見到有個着黑衫同迷彩長褲嘅後生仔跑過，尾隨就分別有一個着藍衫同一個着白衫嘅男人追住佢，最後追到去北河街交界近長沙灣道嘅深水埗港鐵站𨋢口，將個後生仔截住。雙方糾纏間，個後生仔身上三盒類似手機殼嘅產品跌喺地上。

事發後好多街坊喺度圍觀食花生，有花生友以為有人打交，但睇睇吓先知道係有人懷疑偷嘢被捉住，就略嫌無癮話：「唓，都唔係打交嘅！」Andy話，事件中仲好似有街坊被個逃跑嘅後生仔撞跌。冇幾耐警員就趕到現場處理，其中兩個軍裝警就將疑犯拉埋一邊調查。

警員一度問在場圍觀人士，「有冇人見到發生咩事？」點知冇人出聲，咁阿Sir就勸圍觀者散開，「繼續行街啦好唔好呀？」之後警員就拉咗個疑犯上警車帶走。Andy話被偷嘢嗰間特賣場都開咗最少2、3年，以往成日俾人偷嘢，據知今次案中三盒跌喺地上面嘅產品，其中兩盒係疑犯攞嚟換貨嘅，實際係偷咗一件貨啫。

警方就話案中拉咗個21歲姓盧嘅男子，佢涉嫌店舖盜竊，偷去一個價值69蚊嘅手機殼，但事後就冇街坊話跌親受傷，案件交由深水埗CID第2隊跟進。

你敢爆，我敢獎！ 立即WhatsApp《蘋果》24小時爆相爆片熱線或致電：63836568

	後生仔被兩個店員追出捉住。（讀者Andy提供）	 價值69蚊嘅手機殼，據講其中兩盒係後生仔攞嚟換貨。（讀者Andy提供）
 後生仔被捉住後，仍然執返一度跌咗落地嘅手機殼。（讀者Andy提供）	 警員接報到場調查。（讀者Andy提供）	 後生仔涉嫌店舖盜竊被捕。（讀者Andy提供）
 事發電腦特賣場。（讀者Andy提供）

來源 source: http://hk.entertainment.appledaily.com

鍾意就快D Share啦！

下一篇 》