「當你有工人，你要識使工人，你冇工人嗰陣，你要識做工人，有雙手你就搵到兩餐。」這是81歲前無綫「御用工人」梁愛最深切體會。
人稱愛姐的梁愛，是已故名導演左几太太，60年代拍粵語長片入行，直至70年代開始在無綫《江湖小子》、《狂潮》、《京華春夢》、《誓不低頭》、《他來自江湖》、《流氓大亨》甚至早前重播的《義不容情》等劇飾演女傭，由民初到現代，服侍過的事頭閒閒地過百。
原來，「御用工人」愛姐最風光時，曾經擁有3個工人和一個司機，直至67暴動，變成一無所有。
愛姐日前接受《蘋果》專訪時說：「我都做咗幾十歲人，風光又試過，捱窮又試過，67暴動我又捱過，左派同右派鬥，我先生本來同泰國拍咗啲錄影帶同電影，佢哋話佢係左派嘅人，賣唔到過去(泰國)，一夜之間唔見咗成60萬，破咗產，我由3個工人，結果我自己做咗工人。嗰時香港環境立立亂，佢又冇工開，我又冇工開，大家咪食穀種！」
為生活，愛姐走去工廠做包裝工人，丈夫亦變賣自己珍藏的魯迅作品及其他名書過活。愛姐感慨：「一個人擁有嘅嘢唔係必然，所以我奉勸每一個人，當你有工人，你要識使工人，冇工人嗰陣你要識做工人，有雙手你就搵到兩餐。」
後來麗的電視（亞視前身）邀左几和愛姐加盟，兩公婆一個幕後一個幕前，生活總算穩定下來。至70年代，愛姐過檔無綫，開始當上「御用工人」。
「可能我比較醒啲，有好多環境要自己執生，第二，我嗰時好發錢寒，因為我要供個仔喺英國讀書，工人係咪最容易搵錢呀？對白唔使記咁多，可以走幾組，老實講，嗰時都係為錢啫。後期冇咁為錢，咪話唔玩囉，識攰咪唔玩咁多囉。」
00年愛姐重返亞視後，也不時演女傭角色，隨着亞視減少劇集製作，愛姐開始淡出娛樂圈，僅偶爾客串舞台劇和港台劇集演出。
前年年中，愛姐在街上仆倒受傷，留院足足數個月。這一跌，愛姐體重由110磅急跌至73磅，亦因這一跌，導致腰骨痛，要經常服用止痛藥。
不過，止痛藥止得住愛姐肉體上的痛，止不了心靈上的痛，愛姐一生最疼錫的獨生子，數個月前在加拿大因隱性心臟病發猝死，終年55歲。
「上邊要人，佢咪收囉！佢同我say goodbye都冇講，咁就走咗啦。」提起獨生子，硬淨的愛姐忍不住落淚。
「我好似老鼠拉龜，佢走咗我唔可以跟住走㗎嘛，我要堅強！人哋覺得我會發癲，我畀佢睇到我係可以活下去。我本來唔郁得嘅(前年跌傷)，我o依家話畀佢聽我又郁得、又可以活下去，我為呢個仔好緊張，所以我話我表面風光，內裏陰乾，一個女人，就算畀老公激親都唔係咁乜嘢，但你一生人嘅希望，個仔又唔係唔乖，佢又孝順、又好，一年返嚟睇你兩次，佢失驚無神離開咗你，你有乜嘢感想？在我嚟講好似耶穌釘十字架。」
愛姐跟丈夫左几，在片場邂逅相戀結婚，婚後誕下一子(左几與前妻有四子)，後來為了兒子讀書而舉家移民溫哥華。97年左几病逝，愛姐00年回流香港拍劇，兒子一年兩次返港探望，去年兒子探完愛姐後，本訂了機票在去年11月初再返港，為愛姐81歲做大壽，豈料半年前兒子在家中猝死，愛姐回加國出席兒子喪禮，白頭人送黑頭人。
「不過佢死得好好、好舒服，佢從來冇心臟病，佢話頭痛上樓瞓覺，一瞓就瞓咗啦。」
愛姐邊抹眼淚邊說：「我同佢哋講晒拜拜，我哋三人行移民去加拿大，去完之後得番我一個返嚟香港，嗰種感受好難形容，我話：『阿爸，你個仔都跟埋你去下邊啦，睇我幾時嚟啦。』」
愛姐有一個孫仔一個孫女，兩個都快將30歲，在加拿大生活，愛姐習慣獨居生活，無意返加國定居，每日就由鐘點上門清潔打點，閒時相約好友食飯吹水。愛姐說前年仆倒受傷後，醫生本來評估她將臥床不起，叫她準備入住老人院，結果愛姐留院幾個月後，竟康復過來。
「我奉勸所有有病嘅人，一定要話畀自己聽：『我得嘅！』我起得到身……如果你插滿晒啲天綫(喉管)又唔死得，嗰種先係痛苦。命運弄人，如果我唔係咁硬朗，一早畀佢(上天)玩死咗！」
73磅的愛姐，仲撐得住。
精選娛聞，喺晒《娛果》
http://fb.com/appledailyent
| (採訪：戴彩煥)(攝影：馮嘉銘、陳慧安) | | |
| | | |
| | | |
| | | |
| | | |
| | | |
| |
|
鍾意就快D Share啦！
|
|
|