李彩華（Rain）趁着昨日情人節，在社交網宣佈已婚升呢「Mrs. Huang」，自揭已嫁予拍拖半年的內地商人Eric。Rain接受《蘋果》訪問，自爆老公在她去年生日求婚，逗得她有如「食錯藥」一般開心狂笑。Rain與老公都喜歡小朋友，Eric更講到明生小朋友越多越好，不過她不急於趕做「豬媽」，希望順其自然。
現年35歲的李彩華（Rain）趁昨日是情人節宣佈已榮升黃太，她在社交網留言：「Rain+Eric=Mr & Mrs Huang！」自揭已嫁予拍拖半年、從事鋼鐵生意的內地商人Eric。她又貼出印有二人卡通造型的利是封，以及在希臘聖托里尼小島的照片，估計她和Eric早前到希臘度蜜月。
Rain昨日接受《蘋果》訪問，表示已於2月2日領證結婚，稍後會補辦婚宴。她又自爆Eric於去年她11月11日生日當天求婚：「嗰日我要開工，等我收工之後就同我求婚，又預先佈置好晒一個地方。」不過Rain未有感動落淚，她笑說：「佢同我講：『親愛的，可唔可以嫁給我？』我就係咁笑，好似食錯藥咁，我都唔知自己會有咁嘅反應，以前會諗自己可能會喊。」
暗戀多年
拍拖半年就閃婚，Rain大方地說：「其實呢啲好睇雙方，我每次拍拖都好認真，兩個人都有一個想法，就好自然發生。」Rain指老公比她年長幾歲，兩人已經相識多年，Rain甜絲絲地說：「之前我有拍拖，佢話其實一直暗戀我，後來知道我變單身，佢就想辦法同我聯絡。」
| 去年生日Rain在社交網貼出慶生的照片，Eric親自佈置場地及求婚。互聯網圖片 | | |
Rain表示會在香港及內地補辦婚宴，但未落實時間地點，可能會在年底。至於選擇在2月2日結婚，Rain表示沒有特別意思：「我11月11日生日，本來想1月1日，但呢日唔得，所以就2月2日，個日子都好記啲。」Rain趕得及首次以人妻身份在農曆新年派利是，她笑說：「係呀，所以之前都印定啲利是封。」Rain曾經透露希望婚後生小朋友，問到會否做「豬媽」，她反應甚大：「會唔會太趕呀！順其自然啦，但都會喺呢一兩年發生，老公都好鍾意小朋友，佢話越多越好！」
甜蜜遊澳
有讀者報料指在昨午3時許，於澳門四季酒店的購物區見到Rain，身旁正是她的老公Eric，兩人全程手拖手甜蜜逛名店。Rain以短訊回覆說：「我全家人都喺度呀！同埋我細佬，仲有我細佬個仔，因為細佬好快生日，成家人過嚟慶祝。」
情路甚多波折的Rain，入行初時曾與林峯拍戲撻着，之後曾與蕭定一、保險公司高層王傲山、金融才俊潘啟翀及「新五虎」成員何遠恒拍拖。Rain在去年初與何遠恒分手後一直寄情工作，去年到內地拍劇，Eric不時探班而成功打動芳心。對於Rain結婚，舊愛蕭定一簡單回應：「恭喜！」
採訪：小米
|
鍾意就快D Share啦！
|
|
|