金燕玲曾經有感而發：「真愛無需分性別！」佢真係講得好啱呀，事關原來Elaine姐早前確診子宮癌，幸得同居密友蘇施黃仆心仆命貼身照顧，上演活生生嘅患難見情真。
因為前夫有婚外情，Elaine姐2005年時提出離婚，而阿蘇就提出同居互相照顧。直至早前，Elaine姐喺阿蘇主持嘅電台節目《大玩派》，自爆確診子宮癌一期，已開刀切除有機會受感染器官，亦已完成首次化療。阿蘇話Elaine姐抗癌期間奄尖聲悶好難服侍，但自己都曾患癌係過來人，明白對方因療程以致身心俱疲嘅狀態，所以唯有硬食，例如Elaine姐有段時間覺得咩都唔合心意，好易炆好易燥，有日佢突然話要食某牌子嘅蛋糕，阿蘇即刻撲返嚟，兩個人食晒，然後Elaine姐終於唔鬧人，話好食。
唔係阿蘇讚自己，連Elaine姐都盛讚：「原本大家同房瞓，但我病咗之後，佢為我瞓咗好耐廳。佢又會向我個妹同個女，報告我每日情況，等佢哋安心。我真係好感恩。」
阿蘇連日嚟貼身照顧Elaine姐，雖然情況未去到100%好返，仲要繼續化療，但情況有好轉，佢得閒都可以行吓商場輕鬆吓喇！
來源 source: http://nextplus.nextmedia.com
|
鍾意就快D Share啦！
|
|
|