聽聞過有人會扮試產品，然後特登去化妝專櫃化妝，其實只係貪免費又有專人服侍。早前見到王宗堯嘅𡃁模前度黎紀君，以及翻版徐子淇鍾浠文，一行幾人喺人哋舖頭輪住化妝，唔通佢哋都……話晒都係公眾人物，應該唔會咁做嘅。見佢哋化完之後就不停影相，加上IG都有post出當日嘅照片，文字部分亦有「鱔」味，斷估係工作一部分，幫品牌做宣傳。
時下好多藝人都會透過IG搵錢，出一個post，有張相再加幾隻字，就可以賺到宣傳費。當然啦，價格高與低，視乎出post者名氣以及IG粉絲人數，誇張嘅好似萬人迷碧咸咁，據聞一個IG post可賺約200萬（港幣，下同）；球星美斯收近400萬；巨石強森The Rock更誇，要500萬出一個post。雖則黎紀君、鍾浠文未到上述人物嘅級數，但估佢出個post少極都過萬啦。
多與少都好啦，見佢哋幾個女仔，坐低化吓妝，化完影吓相，期間嘻嘻哈哈講吓笑吓，兩個鐘真係話都無咁快就過咗。之後再揀幾張靚相post上網，輕輕鬆鬆袋袋平安。多啲嚟密啲手嘅話，收入都幾可觀。
BTW，外界不時都有傳黎紀君同楊政龍翻撻，當然例牌否認，官腔式話係朋友，但就無否認去對方屋企。唔知呢位開烘焙工作室老闆娘，又有無整吓餅俾楊政龍試味呢？
來源 source: http://nextplus.nextmedia.com
|
鍾意就快D Share啦！
|
|
|