大台劇《福爾摩師奶》中的祖迪費查（陳松伶飾），原來同包租婆妹姐（陳煒飾）係兩姊妹！唔知有無人都覺得，佢哋嘅血緣關係嚟得好突然，仲好「Kamcholia」（監粗嚟呀）？
其實，當知道祖迪同妹姐係姊妹之後，再睇返佢哋每一次見面，原來表情、對白之中，都有暗示到佢哋嘅關係非一般。不過，呢啲暗示實在太隱晦，令觀眾喺未知情嘅情況下去睇，只會認為「一個對眼生喺額頭」，另一個有啲「仇富」，大家睇大家唔順眼，所以見親面態度先會咁惡劣，點都唔會聯想到姊妹關係身上。
祖迪同妹姐第一次見面，係油麻地學校演講派書時。當時妹姐拎條手巾仔包住面，仲以為係因為唔想自己沾上臭粉。而家諗返，原來係唔想俾家姐認出。祖迪又的確認佢唔出，難怪當時會稱呼細妹為「呢位家長」。
之後祖迪被拘留，雖然妹姐一次都無去探望，但當祖迪被「公審」時，佢都有匿喺人群中幫家姐講好說話：「殺咗人仲著住人哋對鞋，驚死無人知佢殺人咩？」原來係想幫家姐，但又唔好意思咁出面。
直至再見面，已經係祖迪搬入香廬。當時祖迪見到妹姐就係包租婆時，表情十分詫異，若有所思咁款。當時睇到呢幕，只係單純認為二人因為「學校派書」一事而積怨，所以再見面就尷尷尬尬，並無諗到姊妹關係之上。但，原來係想表達祖迪見返個妹嘅複雜心情。
劇情並唔係無暗示過二人嘅非一般關係，只係呢啲暗示都太隱晦，而且好衰唔衰呢啲暗示又能夠配合其他情節位，令觀眾誤會佢哋嘅惡劣關係係嚟自「學校派書」一事，所以當二人姊妹關係浮面時，觀眾至會認為牽強、夾硬嚟。
來源 source: http://nextplus.nextmedia.com
|
鍾意就快D Share啦！
|
|
|