掃呢頁CODE去手機

2019年4月10日 星期三

【三太搶四太閘抱孫】何猷啟秘婚年多有11個月大B女 當街學行親買尿片 __,三太,何猷啟,四太,梁安琪,

當大家以為四太就快抱孫,誰知有指三太原來早已成為祖母。舊年年初,何猷啟向大陸女友Gigi求婚嗰陣,社交圈有傳佢雙喜臨門。近日見佢同Gigi,仲有一個大 ...


當大家以為四太就快抱孫,誰知有指三太原來早已成為祖母。

舊年年初,何猷啟向大陸女友Gigi求婚嗰陣,社交圈有傳佢雙喜臨門。近日見佢同Gigi,仲有一個大約11個月大嘅B女,一齊出動。何猷啟親自去買尿片,相信佢哋同呢個B女關係好密切。

不過秘婚年幾,就有個11個月大嘅女,唔慣講大話嘅猷啟有點尷尬,同時顯得口窒窒。

初時問到佢同B女嘅關係,佢猶豫咗一下話:「哦,你可唔可以遲啲打畀我?」

再追問係咪佢個女,猷啟諗咗幾秒,竟然話:「我……我遲啲同你講,好唔好?」然後便匆匆收線。

如果唔係自己個女,身為千億富二代,相信猷啟同太太唔會得閒去湊人哋個B。當日所見,猷啟親自去買尿片,好細心咁挑選,然後拎住袋尿片周街走。Gigi更當街教BB學行,一家三口咁款。

其實舊年2月,何猷啟自爆求婚成功之後,一直收埋Gigi。

同年5月,壹仔見佢孖住Gigi行街,當時Gigi肚凸凸,大家仲以為佢有餡。

不過當時一班闊太就有唔同講法,話佢可能已經生咗。

如果舊年5月已經生咗,依家個b起碼有11個月大,同何猷啟夫婦湊緊嘅B女年紀差唔多。

B女眼大大,真係有d似猷啟。而且手長腳長,都幾似佢哋兩夫婦。

Gigi嘅身材比起舊年,亦已經弗晒,收咗身。

事實上,舊年猷啟不斷強調自己只係求咗婚。但到今年2月,佢突然改口話同Gigi已經喺外國註冊,結咗婚超過一年。

佢話Gigi唔係內地富二代,以前住喺深圳,喺內地從事教育同金融工作,透過朋友介紹認識嘅。

當日Gigi不但湊住b女,仲拎住一間大陸貴價婦產、兒科醫療集團嘅文件夾,呢個高檔醫療集團聲稱有哈佛專家助陣,喺深圳都有門診,啱晒賭王新抱嘅身份。不過依家佢已經住喺香港,照計唔使返深圳睇醫生,睇怕係用個舊文件夾啫。

之前猷啟講過想生兩、三個小朋友,更希望有龍鳳胎,相信佢哋會繼續努力!

攝錄:吳斯金、李玄

立即下載Apps,隨時隨地睇盡時政專題、深度偵查、娛樂熱話。按此連結: http://bit.ly/next28app

相關新聞:【冇份湊孫|婆媳關係麻麻】猷啟帶妻女搬離大宅 三太聞新抱扁嘴變臉




來源 source: http://s.nextmedia.com
鍾意就快D Share啦!