- 《利瑪竇》音樂劇獲特首捧場 家燕姐高呼︰王梓軒好正﹗
- 30分鐘前
昨晚(21日)音樂舞台劇《利瑪竇》，假尖沙咀文化中心舉行第3場，有多位姐級嘉賓前來觀賞，包括；行政長官林鄭月娥女士、徐小鳳、汪明荃、薛家燕、羅蘭、張衞健等等，場面非常熱鬧！
咁多位重量級嘉賓睇住，男主角王梓軒(Jonathan)同女主角陳潔儀(Kit)當然冇因為咁而怯場，表現更超出水準，尾聲時，台上台下都眼濕濕，Jonathan話：「我喺台上都被感動到喊！」
恩保德神父在台上自爆同劉松仁相識60年，恩神父話：「60年前，我接觸佢(松哥)，佢係細路仔，我唔敢講佢嗰時係6、7歲定9歲，我哋一直都係朋友，我好開心同呢個朋友做呢個有水準嘅舞台劇，佢為咗呢個舞台劇奉獻咗2年，2年冇做過其他嘢。」引來全場拍掌！
家燕姐約埋莫何敏儀一齊前來欣賞，家燕姐大讚舞台劇精彩，佢話：「睇到整體製作好用心，好欣賞松哥，知道佢花咗2年時間去編排、監製、製作，王梓軒好正，陳潔儀把聲好靚，佢哋後生做到老都好睇，整體演員都做得好好，令我為之讚嘆。」
方力申亦因為拍電視劇《華麗轉身》認識松哥，佢話：「好感動！感受到台前幕後都好有誠意，1年前松哥有同我講過呢個故仔同籌備，嗰時已經非常期待，梓軒犀利到不得了，又要唱又要講意大利文、文言文咁多嘅對白，真係好利害，好好睇！」
來源 source: http://nextplus.nextmedia.com
|
鍾意就快D Share啦！
|
|
|
