【驚訝五歲Jasper已經好黐家】同應采兒幸福竅門 陳小春: 就算老婆錯都唔可以話佢錯
陳小春兒子Jasper，曾在內地真人騷節目《爸爸去那兒》一句神回:「Can you stop angry？」，唔單止敲醒做老豆個心，仲因此成為金句。
依家仲做埋老豆陳小春四月澳門演唱會嘅主題「Stop Angry」，相信係小春作為回應個仔嘅親子互動。
「參加完節目之後父子關係有好大嘅變化，依家佢會挨住我。
我每次見到佢做啲小動作，都會覺得佢究竟係似我吖，定係喺邊度學番嚟？」提起個仔，陳小春臉上永遠一個表情，就係冧。
依家兩父子friend到一個地步，是有個屬於他們的父子秘密。
「老婆有時會製造啲機會俾我，等我同個仔兩個單獨去食飯，我就會私底下同個仔講，話媽咪叫我同你食飯，佢會話:『Yeah, ice lemon tea』，因為佢好鍾意飲檸檬茶，然後會叫佢唔好同媽咪講。其實佢都唔係點食飯，最主要都係想飲杯檸檬茶，之後會再去玩具反斗城，最主要都係呢兩樣嘢，即係利用我啦。」
Jasper在鏡頭前嘅率真紅遍中港，依家小春開演唱會，可能大家順理成章會諗，應該有part父子同台演出啩！而事實係…..
「唔好喇！好多人問我會唔會叫個仔上台？我心諗叫佢上台做咩？同大家say hello？上台就無謂喇，好好哋專心讀書就算其他嘢最好唔好接觸，自己身為過來人，喺呢個行業同咁嘅環境，都覺得好辛苦，所以只想佢乖乖哋讀書，好好學習。」
五歲嘅Jasper，自動波讀書，呢一點已經叫老豆小春好安慰。
「上個月學校頒咗個課外活動嘅閱讀銅獎俾佢，平時佢都好鍾意睇書，譬如有時兩公婆接佢返屋企，問佢今晚一齊出去食飯好唔好？佢會話唔去喇，你哋去啦。我聽到之後覺得唔錯呀，似我依家鍾意黐家。」佢嘅冧樣又再一次展現。
「人大咗，有個家庭的確開心好多，同埋個推動力會令你變得更加強大，以前無諗過會咁樣，原來自己有一個新家庭，係會有呢個魔力。結婚後，朝早起身同臨瞓都會叫聲老婆，發覺原來要咁樣做。而家有小朋友，同佢講句good morning，感覺又會唔同咗，唔可以用甜絲絲咁膚淺，但自己嘅感覺真係好深。」
面前呢個大男人，估唔到同另一半嘅相處竅門，就係老婆永遠是對的。
「已經結咗婚，就唔會諗住有離婚嘅一日，呢個係我嘅睇法，加上而家有埋小朋友，所以都順理成章，老婆唔會害我嘅，所以都樂意聽佢意見。最初結婚未有小朋友嘅時候，或多或少有啲嘈交，慢慢發覺多一句不如少一句。感覺到老婆勢色唔對嘅話，就唔好出聲，多一句不如少一句，都係好似剛才咁講，無論點樣都拗唔贏佢，就算係佢錯都唔可以話佢錯。」幸福指數咁爆燈，磨合遷就就係不變嘅秘笈。
採訪:Sukey Lo
攝錄:蕭敬漁
場地:Harlan’s(The ONE)
服裝:8 by Yoox
化妝:Yan Chiu@ndnco
髮型:Cliff Lam@Beijing Hair Culture
來源 source: http://nextplus.nextmedia.com
|
鍾意就快D Share啦！
|
|
|
