大家無睇錯個標題，民建聯元秋蔣麗芸暴走，喝罵做緊立法會代主席、同時係元秋自己黨嘅主席李慧琼話「你唔好叫我個名﹗」而且元秋係為咗民主派專業議政葉建源先咁樣大鬧㗎！
話說葉建源喺休會辯論發言，提到今次修例一事上，見到中聯辦「一聲令下」建制派立即全部歸位。可能崩口人忌崩口碗，元秋聽到火到嚟埋，話《議規》唔畀議員猜度、想像其他議員，仲鬧葉建源「人哋（中聯辦）命令過你咩？你聽過咩？」
做代主席嘅李慧琼可能諗住勸交，於是叫一叫咗元秋個名，點知元秋嘅怒火瞬間升到極點，一手指住李慧琼話：「你唔好叫我個名﹗」李慧琼都被嚇窒，結果反而要由曾經爆粗鬧特首林鄭月娥嘅工聯會麥美娟拉元秋出去。
過咗陣，元秋怒氣未消，喺葉建源講完嘢又起身話，葉建源建議調查係咪包埋有老師迫學生罷課先，又聲稱佢手上有學校、老師嘅名單。素來唔打爛仔交嘅葉建源不慍不火，起身回應話元秋講嘅唔係事實，根本無老師迫學生遊行。無啦啦被元秋鬧埋嘅李慧琼，亦嗱嗱聲叫下一位發言嘅議員講嘢，了咗件事就算。
被麥美娟拉埋一邊嘅元秋情緒激動，一度喺會議廳內Fing開麥美娟隻手，再走向黨友何俊賢同陳恒鑌身邊吐苦水，其間何俊賢似乎唔太想聽，元秋埋身無耐即離開會議廳，陳恒鑌亦疑似頂唔順元秋，喺元秋吐苦水全程低頭，唔想同對方有眼神接觸，再喺元秋歸位無耐就離開會議廳。
-----------------------------
七一遊行2019
主題：撤回惡法 林鄭下台
副題/口號：重啟政改 釋放所有政治犯 撤銷暴動定性 徹查612鎮壓
日期：2019年7月1日
集合時間：下午2時30分
遊行路線：銅鑼灣維園中央草坪至金鐘政府總部
主辦團體：民間人權陣線
-----------------------------
【登記做選民 7月2日截止】
登記方法：
。親身取表填寫及郵遞
。網上登記（可用手機登入，在選舉事務處網頁打開REO-1表格，使用免費手機應用程式Adobe Fill & Sign打開表格，再按指示填寫資料，按儲存文件並以點擊分享，再電郵至 form@reo.gov.hk）
詳情可參閱選舉事務處網頁：
https://www.reo.gov.hk/ch/voter/gcnr.htm
-----------------------------
7月4日起 《蘋果動新聞》只限升級壹會員閱覽
繼續撐蘋果！
| 元秋喝罵李慧琼：「你唔好叫我個名﹗」資料圖片 | |
|
鍾意就快D Share啦！
|
|
|
