90年代出道的黎明詩，當年一身東洋味、甜美的笑容，的確迷倒不少少男，故被封為「青春玉女」歌手，可惜她在娛樂圈發展只有短短6年就淡出，黎明詩早前在尖沙嘴接受《蘋果》專訪時，她表示因當年不太適應娛樂圈的生存模式，加上遇到結婚對象，所以會有是時候步進另一階段的想法。捨得放棄演藝事業？黎明詩說：「無奈，可能我比較感情用事，如果遇到個啱，自己又到咗結婚年齡，咁不如結婚啦，捨唔捨得，我又冇諗，總之下一步就係結婚，做家庭主婦，做人妻。」
好景不常，黎明詩的婚姻生活最終失敗收場，不過在兩年前，她突然公佈與同性密友Kelly一起：「其實我冇特登決定要公佈，只係當時有記者問呢個問題，我諗同佢一齊都一段時間，感情都穩定，所以講出嚟。」突然宣佈出櫃，她坦言不是性向問題，只因人大了，看法有所改變，她只是想找個真正了解、愛錫自己的伴侶：「細個結婚係因為由細到大都覺得，女仔出嚟社會做嘢，然後結婚生仔，我試過，但可惜唔work，我同前夫性格唔夾，大家都拖拉咗10幾年，其實結咗婚5年，大家好似有大家嘅生活，我哋好冷靜咁傾過，然後分開。」
直至數年前遇上Kelly，人生從此改變：「我以前同妹妹喺英國都選過華裔小姐，唐人街好多人都知我哋係邊個，有時我哋又會去媽咪間餐廳幫手，Kelly以前都係喺英國讀書，佢由朋友口中知道有我哋兩個，到佢畢業嘅時候，我已經返咗香港唱歌，所以當時我哋係唔認識，後來由朋友介紹，我哋先至認識，好似有啲緣份，大家就成為好朋友；其實人大咗，都唔係為咗名份、男定女，只要大家相處得好、開心。」Kelly付出的關心多於前夫？黎明詩說：「係唔同，但又唔可以相提並論。」決定與Kelly一起，黎明詩指前夫知道後，起初都有點愕然：「但佢覺得最重要係我同Kelly開心，我父母都係咁諗。」問及Kelly對她做過甚麼感動事？黎明詩甜笑說：「好多，佢對我、對朋友都好關心，心照嘅，有時感動位未必講到出嚟。」
曾做過人妻，後來遇上密友Kelly，自己更對她有感覺，當時的內心有沒有挣扎過？黎明詩說：「我喺英國讀書，所以我都好開通，加上我有好多同性戀嘅朋友，所以我對呢樣嘢唔會好抗拒，只不過我冇諗過我自己會同同性一齊。」大部份香港人的思想仍是守舊派，有時看到街上的同性手拖手都會眼望望，黎明詩笑說：「女仔會好啲，如果男仔望到兩個男仔咁樣就『咿』，其實喺外國周圍都見到，見怪不怪，見到佢哋好sweet，都會戥佢哋開心，因為你唔知人哋嘅關係有幾好而令到佢哋嘅眼神咁樣互望對方。」對於台灣早前通過同性婚姻合法化，黎明詩表示：「未諗呀，做住個伴先，因為好多嘢都未知，但係我諗我哋幾穩定嘅，又唔使刻意要結婚，最重要係開心。」
兩年前，黎明詩罕有現身公開活動，是否有復出之意？她說：「其實冇特別想復出，咁啱朋友搞唱歌比賽，我咪幫手做評判，同埋佢叫我唱番首歌，其實我亮相《流行經典50年》之前，已經有人搵我，但我話唔好喇，因為我冇乜信心，又肥，又冇練歌，加上冇出嚟廿幾年，我驚自己失禮，狀態唔好，而家都係順其自然（復出），因為我都會周圍去玩，我已經計劃去日本、清邁、英國，所以我又唔會全身投入工作，如果有時間啱就做吓，但呢兩年我好開心，撞番歌手朋友，有時喺慈善騷唱歌又見番以前嘅fans，我哋而家都成為咗朋友，所以我嘅信心大咗。」
黎明詩、黃翊、胡渭康、林利、何婉盈、黃寶欣、莫鎮賢、文佩玲、陸家俊將於9月11日及12日假伊館舉行兩場《記得……我們的主打歌演唱會》，袁志偉更擔任特別嘉賓，現身與黎明詩合唱：「同袁志偉有首合唱歌，我會唱一快一慢嘅自己歌，仲有3首大合唱歌。」會否覺得「唔夠喉」，將來有機會開個人演唱會？她說：「呢個遲一步先，我覺得成班人一齊去開會開心啲，熱鬧啲。」
今次重遇一班歌手朋友，黎明詩坦言感覺很不同：「大家比起當年廿幾歲嘅時候都各有經歷，見到面會更加珍惜，會諗番起當年『我唔敢同你講嘢，公司話唔好咁熟。』但而家冇呢啲壓力，我哋仲開咗個group，關係close咗，加上而家冇唱片公司或者經理人嘅掣肘，傾乜都得。」
提及今次主題是主打歌，當年黎明詩曾推出過6張個人專輯，當為人熟悉的有《停不了的愛》、《愛上不愛我的人》等等，而改編歌則有《敢恨敢愛》、《Goodbye My Love》，其中《敢恨敢愛》一歌，與許志安《唯獨你是不可取替》及鄭秀文《衝動點唱》屬同一曲調，黎明詩說：「許志安嗰首係慢歌，感覺係唔同，鄭秀文嗰首係輕快少少，我嗰首比較快啲，係3個唔同感覺，所以唔怕比較。」
採訪：黃曉妍
攝錄：馮嘉銘
場地：The AIR（The ONE）
-----------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
|
鍾意就快D Share啦！
|
|
|