從小愛看粵劇的譚倩紅就算不再拍戲，仍繼續踏台板唱粵曲，紅姨在訪問當天便準備為高山劇場一個戲曲晚會演出。紅姨入行也是緣份，本想拜鄧碧雲為師，但最後由任劍輝做開山師傅：「嗰時我爸爸開洗衣舖，碧姐就住喺我哋3樓，橫掂我自己咁鍾意學戲，得12、13歲，希望跟到碧姐啦。點知碧姐要去廣州做戲，嗰時係日治時候，所以碧姐唔敢帶我上廣州，咁就將我交咗畀任姐。」
相關新聞：麥皮花膠做早餐養生
九大姐結義金蘭
當年戲行興結義金蘭，紅姨與李香琴及任冰兒等二幫花旦結拜為「九大姐」，紅姨憶述當年因拍戲結緣：「余麗珍間公司拍一套《十二寡婦征西》，好多花旦仔一齊，嗰時個個二十幾歲，好開心。我哋拍完戲就唔見到面，我話不如一個月聚會一次見吓面喇，吹吓水都好啦。」後來大家一個月聚會一次：「約定每個月9號，當時好多記者朋友走嚟影吓相。原本我哋有10個人，後尾紅豆子同林家聲結咗婚後，話冇乜時間出嚟，佢就退出咗。」九個女生、每月9日聚會，因而被記者稱為「九大姐」。
「九大姐」之一的琴姐近年腦退化，紅姨表示偶爾有探望：「去到都唔認得我哋㗎啦，個心好悒，好心悒，一個咁精靈嘅人會忽然間變成咁。」紅姨愛唱粵曲也愛打台灣牌，偶爾會到白雪仙家中開枱：「呢啲可以運動你嘅頭腦囉，一定唔會老人癡呆。」
|
鍾意就快D Share啦！
|
|
|
