【頭條獨家】從影最激 《夕霧花園》首演露背情慾戲 李心潔爆老公彭順唔想䏲
李心潔入行23年，一直守身如玉，最近相隔4年演出馬來西亞電影《夕霧花園》，跟日本型男阿部寛首演大露背情慾戲，絕對是她從影以來最激一次。不過心潔話，其實自己向來冇底線，只要劇情需要絕對可以不顧一切，甚至露點演出都冇問題，她更直言有充滿魅力的型男阿部寛做對手，令她更容易投入演出。不過，她又大爆最初同導演老公彭順講時，老公反應竟然係「我唔睇之嘛！」但她最後成功爭取老公睇馬來西亞版，笑言：「因為剪走咗！」 撰文：杜淑霞 攝影：李維隆 形象：Kary Kwok 髮型：Domanic Tao@Orient4 化妝：Jane Lin 服裝：Chanel、Maison Boinet@Cocktail、 Fion Poon 場地：Soho House Hong Kong
心潔自從16年為彭順生完一對孖仔後專心湊仔，但今次電影太吸引令她決心復工，「個角色同故仔非常好，個年代我又未嘗試過，對我嚟講係突破，又係馬來西亞電影，雖然我係馬來西亞人，但係我事業喺台灣同香港，演嘅角色都係外國人多，一直希望多啲返去馬來西亞演出，今次係第二次做番馬來西亞人，所以睇完劇本好開心同激動，加上導演係林書宇，仲有對手係阿部寛。」
露點都接受到
講到跟阿部寛的情慾戲，心潔坦言第一日做演員已冇考慮這問題，「對我嚟講身體就係表演一部份，只要劇本有咁需要，合情合理同埋對個劇情有幫助推展就冇所謂，我睇到呢個劇本時，由頭到尾都冇畀導演壓力話我只可以露幾多，淨係溝通咩程度嘅裸露最符合呢場戲，話畀我聽就得，我真係可以100%配合。（如果露點呢？）我自己其實接受㗎！（彭生呢？）咁梗係要禮貌上同尊重上，哈哈！我一定會講嘅。最初接到呢個劇本時，係有好多呢啲戲，我有同佢講清楚，佢就好直接話：『唔緊要，我唔睇之嘛！』但係我拍落真係覺得好好，最後𦧲到佢睇馬來西亞版，因為剪走咗！哈哈！好彩佢係同行，係導演一定要明白同接受，我係行呢條路嘅演員，會為咗表演不顧一切！（係咪冇底線？）首先劇本有需要，第二，個導演我好信任，第三，個男主角我值得同佢喺戲裏面咁做。好似今次我同阿部寛場戲係好緊要，唔係單純講做呢件事，係個角色激發咗潛在嘅憤怒，係我演戲以來最難處理嘅一場戲，難在我喺場戲咁短嘅表演裏面，將咁複雜嘅情緒好有層次配合表現出嚟，我拍時都係只做到一Take。」
冇演員嫌獎少
心潔坦言今次對手是阿部寛，對她演出有好大幫助，「第一次同日本演員合作，就係同佢真係好興奮，佢真係好有魅力，同埋佢企喺度氣場好大，揀啱演員好緊要，我慳咗好多力，我唔使費力就可以愛上佢，同埋佢個角色係一個園藝大師，佢有嗰個風範，佢講啲對白都好有智慧，冇一個咁有分量嘅演員講冇嗰份說服力。」本來心潔覺得跟角色「雲林」不太相似，但愈拍愈發覺對方對愛的執着有着自己的影子，「後尾都覺得有啲似自己經歷挫折嘅時間，同埋深愛一人嗰種痛係好明白。（所以更需要彭生去睇？）哈哈！當然我每一部戲都好想佢去睇，佢嘅肯定都係我好大鼓勵嚟嘅，因為佢係我真親密嘅人，佢又係做呢行，係一個導演，佢又咁熟識我，睇我睇咗咁多年，睇我嘅電影仲覺得有新嘢同突破係好緊要。」
講到再憑電影入圍金馬獎最佳女主角，心潔認為是好大肯定，但認為攞獎始終要靠運氣，而她雖然提名及獲獎經驗豐富，仍會覺得激動和緊張，「無論咩年紀都好，冇一個演員嫌獎少，哈哈！只不過今次提名同以前有唔同意義，第一次提名時我仲係新演員，就咁攞咗，當然呢個肯定幫到繼續行演員嘅路，但同時畀人定型，於是我就拒絕去演呢類戲，去搵唔同嘅機會，但唔知呢世等唔等到，所以呢次有提名令我好激動。」
|
鍾意就快D Share啦！
|
|
|